DILI, STLNEWS.co – Prezidente Republika (PR) Jose Ramos Horta husu lider partidu politiku (Parpol) neebe tun kampanha kompete iha eleisaun parlamentar, diak liu foka deit ba planu programa ba tinan 5 hodi hadia povu nia moris, labele tun konta fali partidu seluk.
Prezidente Republika Jose Ramos Horta hatoo kestaun nee bainhira remata partisipa serimonia komemorasaun aniversariu dala Uluk adezaun Timor Leste no deklarasaun dala uluk dokumentu Fraternidade Humana iha Parlamentu Nasional, Tersa nee (25/04/2023).
Prezidente hatete, partidu politiku sira neebe mak insulta malu iha kampanha nee, sira senti katak nia partridu mak bele rezolve problema Timor nia, idak-idak mos gosta poder no uza poder hatete katak nia mak halo diak liu, husi nee bele hamosu ona konfrontasaun ideas, konfrontasaun politika.
Prezidente hatete, mezmu uza lian kroat iha konfrontasaun politika nee la buat ida, nee normal iha nasaun demokrasia.
“Inves koalia konaba partidu nia programa, maibe konta fali lider seluk, partidu seluk, signifika eleitores seidauk konhese o nia programa o koalia beibeik lider seluk, partidu seluk, nusa la foka ba programa tinan 5 mai nee, o hakarak halo saida para hadia povu nia moris,” katak prezidente.
Xefe Estadu mos observa no rona partidu politiku neebe mak tun kampanha hodi promesa ba povu katak, sei kria dezempregu maibe la hatene planu.
“Partidu balun hau rona dehan ami hakarak kria postu empregu, ami hakarak rezolve edukasaun, favor esplika oinsa bele kria empregu no oinsa rezolve edukasaun, maibe ba mak sira koalia deit nunee, depois ita boot sira jornalista podia litik sira katak, ita boot atu kria empregu, favor esplika ba ami kria empregu nee oinsa, los ami hakarak rona ida nee, nee sira atrapalha ona,” katak nia.
Iha biban nee, prezidente mos hatete, konaba ema neebe mak tuda militante CNRT iha Munisipiu Vikeke, parte Postu Administrativu Uatulari no Osso, ida nee laos lider partidu politiku sira mak haruka, maibe komunidade sira mak laiha konsiensia hodi halo asaun nee, dala ruma mos tanba lanu.
“Hau la fiar lider FRETILIN ka lider ruma mak halo kondena violensia, mais iha partidu balun, sempre iha elementu balun, sempre iha fatin hotu-hotu, grupu arte marsial, grupu football, grupu iha neebe deit sempre iha eleimentu radikal, dala ruma mos tanba hemu tua, dala ruma mos tanba frustadu sira mak halo asaun ida nee, laos problema lideransa partidu politiku,” katak nia.
Prezidente mos husu ba iha partidu politiku sira atu koalia makaas ba iha sira nia militante no membru sira katak, sira lakohi rona militante halo asaun violensia, maibe ida nee mos atu kontrola 100% mos difisil tebes.
Aman nasaun nee hatete, kazu neebe mak akontese iha Vikeke, militante CNRT neebe hetan tuda husi ema deskonhesidu, iha momentu neeba polisia intervene kedas iha fatin akontesimentu.
(eme)
