DILI, STLNEWS.co – Prezidente Republika Jose Ramos Horta ohin halo viajen ba Nova Yorke, hodi partisipa reuniaun Asembleia Jeral ONU ba dala 78, husi loron 17 too 23 Setembru 2023.
Prezidente Republika ba jornalista Sesta nee (15/09/2023) hatete, líder mundu sira hamutuk iha Nova Yorke ba abertura sesaun asembleia Jeral ONU ba dala 78, no atu partisipa iha debate Jeral nível aas anual ho tema rekonstrui konfiansa no hametin solidariedade global, aselera asaun kona-ba ajenda 2030 no ninia objetivu sira dezenvolvimentu sustentavel nian ba pas, prosperidade, progresu no sustentabilidade ba ema hotu.
Prezidente Horta hatete, sei fo deklarasaun nasional iha debate Jeral Reuniaun Jeral ONU ba dala 78 iha loron 21 fulan setembru 2023, atu fahe progresu neebe Timor-Leste atinji ona iha dezenvolvimentu polítiku no ekonomiku iha tinan hirak ikus nee.
Xefi Estadu mos sei partisipa iha dialogu konaba dezenvolvimentu sustentavel ho tema halo reziliensia no la husik ema ida iha kotuk.
“Prezidente mos marka prezensa iha resepsaun ida neebe organiza husi Prezidente Estadus Unidus Amerika, Jose Robinette Biden Jr,” katak nia.
Iha vizita nee, Prezidente Ramos Horta sei hatoo diskursu importante ida konaba investimentu iha seguransa ai haan, solusaun inovativu sira atu rezolve krize hamlaha, iha sede nasoins unidas nian.
Prezidente Horta mos sei partisipa iha eventu ida-neebe organiza husi misaun Tailandia kona-ba promove parseria ba ita-nia futuru komum haforsa parseria multi-Stakeholder ba aselera ODS iha ASEAN, no iha organizasaun mundial saude (OMS) organiza konferensia kona-ba prevensaun no kontrola Moras la komunikavel,” katak nia.
Prezidente sei partisipa iha eventu paralel nível aas kona-ba reforsa solidaridade global, hametin dame no konstrui reziliensia iha país sira neebe efetu husi konflitu no frajilidade, neebe organiza husi g7+, iha loron 22 fulan-Setembru 2023. Eventu nee organiza hamutuk husi Timor-Leste no Sierra Leoa, neebe mak nuudar Prezidente g7+ atual.
Xefe Estadu mos sei partisipa iha eventu paralel neebe organiza husi Millennium Corporation Challenge konaba investimentu ho impaktu boot. Timor Leste sai hanesan benefisiariu ida husi fundu MCC. Iha Julhu 2022, Timor-Leste no Estadus Unidus Amerika liu husi Millennium Corporation Challenge asina Akordu Kompakta.
Estadus Unidus fo US$ 420 millón (subvensaun) ba Timor-Leste ba programa rua programa kona-ba tratamentu bee foer no drainasaun no programa edukasaun ba edukador ensinu sekundariu.
Iha liu husi eventu paralel sira nee, Xefi Estadu sei halao reuniaun bilateral no multilateral Exelensia Prezidente sei finaliza atividade nível aas iha Nova Yorke iha loron 24 fulan Setembru 2023.
(eme)
