Horta Pose Lugu Sai Embaixador EUA

DILI, STLNEWS.co – Prezidente Republika (PR) Jose Ramos Horta fo pose ba Jose Luis Guterres (Lugu) nudar embaixador foun Timor Leste ba Estadu Unidos Amerika (EUA).

Bainhira remata simu pose, Embaixador TL ba EUA, Jose Luis Guterres ba jornalista sira iha Palasiu Prezidente Bairo Pite, Sesta (19/01/2024) hatete, ohin loron importante ba nia simu pose husi PR Horta, hodi asumi nudar embaixador.

“Ba ohin loron nee hanesan loron ida neebe importante tebes ba hau rasik, hau simu nomeasaun husi Prezidente Republika sai Embaixador Republika Demokratika Timor Leste iha Estadu Unidos Amerika, ho sentidu responsabilidade, hau fiar katak konfiansa neebe Prezidente Republika Jose Ramos Horta no governu husi Maun Xanana Gusmao fo para reprezenta Timor iha Estadu Unidos Amerika, signifika katak esforsu hau tenki halo, esforsu kontinua para reforsa tan relasaun neebe ita iha ho diak ho Estadu Unidos Amerika,” hatete embaixador nee.

Nia hatete, nia nudar ema kareira diplomatika hamutuk mos ho diplomatika Ministru Negosiu Estranjeiru sira kareira diplomatika, maibe iha 2006 atual prezidente momentu nee kandidatu ba Primeiru Ministru telefone ba nia iha Nova Yorke hatete, “Lugu ita boot hau eskolha ba Ministru Negosiu Estranjeiru, ami diskuti oituan, maibe tanba hakarak servi ita nia rai hau mai, hatene katak politika nasional laos fasil ita presiza para bele influensia mudansa ba ita nia rai, tanba nee hahu 2006 too ohin hau okupa funsaun hanesan ita boot sira hatene ona iha governu,” katak embaixador.

Jose afirma, ohin fo ondra no oportunidade ba nia hodi serve povu Timor Leste, no ohin loron ho dekretu nomeasaun Republika Republika hatun fali knaar ida atu sai fali hanesan Embaixador ba Estadu Unidos Amerika.

“Hau fila fali ba uma neebe uluk hau pertense, no hau sei halo buat hotu para servi ho lealdade povu Timor Leste nia intrese, no ami iha reunian oituan ho Prezidente Republika, neebe koalia mos sobre servisu neebe atu halao iha Estadu Unidos Amerika, imi hatene katak senhor PR nia uluk rezistensia reprezenta ita nia nasaun iha EUA, neebe esperiensia neebe nia iha transmite ba ami iha reunian daudaun,” katak nia.

Nia afirma, nia simu ho laran kmanek no sei halo kooperasaun nafatin ho EUA no kontinua halao servisu neebe antes nee embaixador sira halo, tanba presiza relasaun no kooperasaun ho nasaun neebe boot iha mundu.

Iha biban nee, Prezidente Republika Jose Ramos Horta husu embaixador halao knaar ho diak, no nafatin servisu hamutuk ho Estadu Unidos Amerika atu hametin nafatin lasu amizade no kooperasaun ba oin hodi hametin relasaun bilateral rai rua ba oin.

Diretor Jeral Assuntu Bilateral Ministeriu Negosio Estranjeiru no kooperasaun, Francisco DionĂ­sio Fernandes ‘Maukura’ hatutan, ohin iha nomeasaun ba Embaixador Polipotensial Jose Luis Guterres no ohin Prezidente Republika fo ona tomada de pose.

“Ohin ita iha nomeasaun no fo tomada de pose ba ita nia Embaixador Polipotensia Dr Jose Luis Guterres, no ohin dader nee Prezidente Republika fo ona tomada de pose hodi halao knaar,” katak nia.

(eme)

LEAVE A REPLY

Please enter your comment!
Please enter your name here