DILI, STLNEWS.co – Prezidente Republika (PR), Jose Ramos Horta hatete, tempu too ona atu hakoak ema hotu, tanba nee refujiadu Timor oan neebe mak uluk tanba funu halai ba Atambua no Kupan, hakarak fila mai Timor Leste bele mai, tanba halo rekonsiliasaun husi Nasaun Unidas.
Prezidente Republika, Jose Ramos Horta, hatoo kestaun nee ba jornalista sira bainhira remata halo vizita ba Servisu Autonomu Medikamentu no Ekipamentu Saude (SAMES), Kampu Alor, Dili, Segunda nee ( 01/08/2022).
Nia hatete, Timor oan neebe mak iha Indonezia durante tinan 20 nia laran, sira nunka halo problema ruma ho Timor oan no nunka mai mete problema iha bairu sira iha sidade Dili laran, tanba nee se mak hakarak fila bele mai fali moris fatin iha Timor Leste.
Xefi Estadu nee haktuir, Timor oan iha Indonezia Kupan no Atambua tinan 20 resin sira nia kontribuisaun diak los moris hakmatek, tempu too ona se mak hakarak fila, bele fila, nee individual ona, uluk tinan 2000 too 2003 nee programa organizadu husi Nasoens Unidas atu semana-semana lori roo boot lori sira fila, hahu kedas iha loron 31 fulan Dezembru tinan 2003.
(eme)
