DILI, STLNEWS.co – Prezidente Republika Jose Ramos Horta hatete, Timor Leste kontinua apoiu ASEAN nia kandidatu ba iha orgaun ONU.
Prezidente Republika Jose Ramos Horta hatoo lia hirak nee liu husi nia diskursu, bainhira partisipa serimonia ASEAN Day iha Embaixada Filipina, Sesta (11/08/2023).
“Ami estabelese ona embaixada iha estadu membru ASEAN 10 hotu, no la kleur tan sei nomeia embaixador ida ba Sekretariadu ASEAN iha Jakarta. Timor-Leste kontinua fo apoiu ba nasaun sira ASEAN nian kandidatura ba orgaun ONU nian. Too iha konsensu entre nasaun ASEAN sira konaba situasaun nasaun espesífiku iha rejiaun nee ka iha nivel global, ami vota hamutuk ho ami nia parseiru no kolega ASEAN sira,” dehan Horta.
Prezidente Republika hatete, Timor Leste prontu sai membru ASEAN, tanba nee mak kontinua hakaas aan hodi hetan konsensus.
“Ita prontu atu tama iha ASEAN no sai membru ida ita sei hakaas aan nafatin atu hetan konsensu, promove dialogu no suporta mediasaun rejional sedu no dialogu atu prevene diferensa no tensaun sira hodi bele hakat ba konflitu armadu nakloke. Ita hamutuk ho ASEAN ho esperiensia no matenek neebe barak, maibe ita hatudu haraik aan no hatene katak ita sei foun ba organizasaun no tenki kontinua aprende, rona liu fali koalia, aprende liu fali diskursu, prontu bainhira husu atu fahe ita nia esperiensia riku, maibe haraik aan,” dehan nia.
Biban nee prezidente mos hatoo parabens ASEAN ba esperiensia furak ida-nee, ba viajen naruk neebe hahu iha tempu neebe aas liu husi Funu Mean, hodi haree ninia rohan, no agora iha inovasaun estraordinariu sira iha dijital, nudar kriador ba solusaun foun ba dezafiu foun sira, hodi antisipa dezafiu sira iha tinan 50 oin mai.
Nia hatutan, objetivu husi aspirasaun no inspirasaun ASEAN nia mak kresimentu ekonomiku, no progresu sosial no dezenvolvimentu kultural.
“Objetivu aspirasaun no inspirasaun ASEAN nian mak kresimentu ekonomiku, progresu sosial no dezenvolvimentu kultural. Hetan benefísiu ba pas rejional no estabilidade ho estadu direitu no prinsípiu sira neebe hakerek iha karta ONU nian, tanba nia haree hanesan parte boot husi vizaun ASEAN nian,” dehan PR Horta.
Prezidente Republika hatete, ho ekonomia balun neebe sae lalais liu iha mundu, maski kresimentu ekonomiku rejional neebe la hanesan, kombinadu husi nasaun ASEAN sira sai laran moras ba ema barak no hetan naran Ekonomia Tiger.
(eme)
