DILI, STLNEWS.co – Prezidente Republika (PR) Jose Ramos Horta senti tristi, bainhira haree komunidade soe lixu arbiru iha fatin publiku sira.
Prezidente Republika Jose Ramos Horta hatoo kestaun nee ba jornalista sira, bainhira remata halo abertura loron nasional konserva bee iha Salaun City 8 Manleuana, Kuarta nee (22/03/2023).
Prezidente Republika hatete, atu prevene soe lixu arbiru, ida nee fila fali ba konsiensia ema idak-idak nia no labele simu plastiku.
Prezidente hatutan, tinan 20 ona governu la rezolve problema bee moos ba populasaun.
Ho situasaun nee, Prezidente Republika Jose Ramos husu governu tau orsamentu oituan hodi halo konservasaun bee moos ba komunidade sira.
Xefi Estadu hatutan, governu mos tenki iha konsiensia hodi haree, labele halo beibeik relatoriu, no komunidade internasional mos labele halo beibeik relatoriu, tanba kada tinan sempre hatama relatoriu ba bee no meiu ambiente, maibe la tau osan didiak hodi ajuda no rezolve komunidade sira nia problema ba bee moos no seluk tan.
(eme)
