UATULARI, STLNEWS.co – Bainhira halao mini kampanha iha Suku Vesoru, Postu Administrativa Uatulari, Munisipiu Vikeke, Sekretariu Jeral Partidu FRETILIN, Mari Alkatiri sadik nafatin Prezidente Partidu CNRT, Kay Rala Xanana Gusmao atu halo debate publiku konaba asuntu saida deit, inklui Fronteira Maritima ho roo Haksolok, atu nunee povu bele hatene informasaun neebe lo-loos.
Informa Alkatiri iha ambitu Partidu FRETILIN halao mini kampanha ba da-5, iha Postu Administrativa Uatulari, Munisipiu Vikekek (27/04/2023).
“Hau husu debate ho Xanana sira rezeita, maibe hau sadik nafatin, tanba saida, laos tanba atu manan iha nia fatin ka atu lakon, tanba povu presiza hetan informasaun lo-loos, labele manipula nafatin povu nia opiniaun, tanba nee mak hau sadik nafatin, hakarak votu povu nian mai ita nain rua halo debate, para povu bele hatene lo-loos se mak iha razaun, se mak laiha,” hatete SekJer Partidu FRETILIN, Mari.
Fundador FRETILIN no estadu nee dehan, debate laos buka atu manan ka lakon, maibe debate hanesan dalan ida atu esplika ba povu atu hatene idak-idak nia razaun.
Iha biban nee mos Sekretariu Jeral Partidu FRETILIN, Mari Alkatiri garante katak, FRETILIN sei manan ho 30 kadeira iha eleisaun parlamentar tinan nee, tanba haree ba entusiazmu povu nian fila mai uma lisan FRETILIN.
Maski tinan rua ho balu FRETILIN viabliza governu da-8, konsege rezolve problema lubuk ida hanesan edukasaun, halo uma naroman ba povu, sesta bazika no subsidiu anual US$ 200.
Iha fatin hanesan, Koordenador Partidu FRETILIN, Dario Madeira hatete, tinan 15 ukun gasta osan barak, maibe estrada iha Vikeke liu liu Uatulari sei aat nafatin, tanba nee iha eleisaun 21 Maiu agora vota ba FRETILIN, atu nunee FRETILIN manan bele hadia estrada iha Vikeke ba Uatulari.
(car)
