DILI, STLNEWS.co – Hadia setor ekonomia iha rai laran hodi kria kampu servisu ba Timor oan sira, governu tenki investe makaas iha setor infraestrutura, tanba nia hanesan xave bele fo servisu ba Timor oan barak.
“Kada loron ita nia joven barak mak halerik, tanba numeru dezempregu aas iha TL, tan nee atu fo servisu ba joven sira nee, dalan diak ba governu mak ita tenki investe makaas iha setor infraestrutura, ho nunee bele fo servisu ba Timor oan sira,” kestaun nee fo sai husi membru Kamara Komersiu Industria Munisipiu Ermera, Antonio da Costa ba jornalista Tersa (29/08/2023) iha MAP Komoro.
Nia afirma, atu fo servisu ba Timor oan sira mak governu tenki barani dezenvolve setor infraestrutura, loke industria boot iha rai laran, no dada mos investor internasional sira mai investe, fo kreditu ba setor privadu rai laran ho funan kiik, atu nunee sira bele loke netik industria kiik ruma hodi kria kampu servisu ba joven sira, tanba iha nasaun barak sira nia setor privadu moris tanba governu tulun liu husi fasilita kreditu.
Iha parte seluk, reprezentante povu iha uma fukun Parlamentu Nasional, Deputadu Oscar Lima hateten, setor neebe atu fo servisu ba ema barak nee mak setor infraestrutura, maibe durante nee laiha projetu foun lao iha rai laran, tan nee kompanhia barak hapara nia trabalhador, tan deit laiha osan atu selu ema.
“Sujere orsamentu neebe sei mai nee tenki investe makaas iha infraestrutura, tanba povu barak sei mukit ba estrada susar atu lori produtu ba faan iha merkadu, no trablhador barak tenki sofre tanba atividade iha kompanhia ladun iha, tan nee hahu agora governu tenki investe iha setor sira nee hodi fo servisu ba joven sira,” dehan Deputadu Oscar Lima.
(mad)
