DILI, STLNEWS.co – International Republican Institute (IRI) hasoru Prezidente Parlamentu Nasional (PN), objetivu koalia konaba haforsa prinsipiu demokrasia iha Timor Leste (TL), tanba husi kooperasaun nee sei halo buat diak iha nasaun.
Tuir Diretora Programa Rezidente, Dianna Margaret James katak, prezensa husi IRI iha Timor Leste hahu iha 2000.
“Ami apoiu no servisu makaas oinsa bele estabiliza ba setor importante sira, liu husi governu demokrasia nian, programa neebe ami atu investe no mai koalia ho Parlamentu Nasional, objetivu oinsa bele haforsa prinsipiu demokrasia iha Timor Leste, tanba nee ita fiar katak husi ita nia kooperasaun sei halo buat diak iha nasaun laran,” dehan nia ba jornalista sira iha PN, Tersa nee (25/07/2023).
Nia hatete, tanba nee mai atu halo relasaun ho kooperasaun ida metin, oinsa bele implementa planu importante sira iha Timor Leste, liu-liu atu fo apoiu ba membru PN sira, hodi moderniza nia misaun no vizaun ho estavel.
Nia dehan, IRI nia hakarak oinsa bele halo relasaun ida metin ho Timor Leste, hodi kria rede servisu (Networking), atu muda situasaun sira neebe posivel, hadiak nasaun nia prinsipiu ba futuru ho dignu.
Nia afirma, prinsipiu husi IRI atu haforsa demokrasia PN liu-liu Prezidente Maria Fernanda Lay, oinsa bele hetan solusaun ruma, nunee bele servisu diak liu tan iha nasaun Timor Leste, tanba hakarak apoiu ba memebru parlamentar sira atu servisu ho diak.
“Ami halo dialogu interna ho Prezidente Parlamentu Nasional, oinsa ami bele hetan oportunidade ruma, maizumenus saida amk ami bele halo hodi ajuda ba Timor Leste,” tenik nia.
Nia sublina, IRI nia programa ezemplu mak prepara halo seminariu, hamutuk ho membru PN sira, nomos saida mak bele rona husi sira, hodi ajuda no suporta liu tan ba memebru parlamentu nasional sira atu servisu ho diak.
Aleinde Prezidente Parlamentu Nasional (PPN), Maria Fernanda Lay, nia parte husi programa IRI neebe mai aprezenta iha PN, hetan solusaun neebe pozitivu tebes. Fo oportunidade ba IRI atu servisu besik ho komisaun sira.
“Liu-liu liga ba programa koalia ba hau, no fiar ita nia kooperasaun sei avansa ba oin nafatin durante mandatu VI lejizlatura hotu,” sublina nia.
(dom)
