DILI, STLNEWS.co – Kauza husi irigasaun neebe la diak, halo povu agrikultor sira faan hotu ona rai natar fatin ba ema estranjeiru sira, tanba nee husu governu atu toma konsiderasaun, hadia irigasaun neebe aat, fasilita agrikultor iha baze.
“Ita koalia bazeia ba situasaun real iha Munisipiu Manatutu, rai natar fatin atu nakonu ona ho uma, tan nee husu ba governu atu fo atensaun lalais ba irigasaun sira neebe aat, liu-liu iha munisipiu sira neebe potensial ba agrikultor halo natar no toos, se lae mak rai natar fatin sei nakonu hotu ona ho uma, oinsa atu hasae produsaun agrikola iha rai laran, hodi redus importasaun,” lia hirak nee fo sai husi reprezentante povu iha uma fukun Parlamentu Nasional, Deputada CNRT, Gabriel Soares liu husi sesaun plenaria iha Parlamentu Nasional, Segunda (07/08/2023).
Nia afirma, agora governu tenki fo importansia ba irigasaun sira neebe aat ona, hadia halo diak hodi fornese ba agrikultor sira nia natar, se lae aban bainrua natar fatin sira nee uma mak sei nakonu iha laran.
Iha Munisipiu Manatutu, tinan ida agrikultor sira halai natar dala rua, epoka primeiru no segudu, tan nee sira ladun sosa fos importasaun, tanba tinan 1 produs dala rua, maibe hafoin irigasaun aat no laiha atensaun husi governu mak natar fatin sira nee faan hotu ona, agora uma mutin mak hamriik fali iha natar laran, pois governu dehan agrikultor sira mak baruk halo natar, maibe realidade governu rasik la halo nia papel iha baze.
Hatan ba Kestaun nee, Diretor Nasional Irigasaun, Ministeriu Agrikultura Pekuaria Peska no Floresta (MAPPF), Martinho Lourentino hateten, irigasaun neebe eziste iha rai laran hamutuk atus 4 resin, husi total nee kuaze 20 resin deit mak funsiona ho diak, barak mak seidauk.
“Ami hadia ona irigasaun balun neebe hetan ona estragus no balun seidauk, tanba orsamentu neebe aloka mai iha ministeriu nee kiik tebes, tanba nee ita labele halo buat hotu dala ida, maibe governu ida nee iha hanoin atu hasae produsaun, fiar katak ita sei rezolvle agrikultor sira nia halerik nee,” dehan Diretor Jeral MAPPF.
Nia afirma, inundasaun neebe uluk akontese nee estraga irigasaun barak, no agrikultor sira natar barak mak hetan estragus, hirak nee hotu governu seidauk rezolve hotu, tanba orsamentu laiha, no osan neebe aloka mai iha MAPPF nee laos atu haree deit ba irigasaun neebe aat, maibe haree mos ba problema sira seluk.
(mad)
