DILI, STLNEWS.co – IX Governu lidera husi Primeiru Ministru (PM) Kay Rala Xanana Gusmão hamutuk ho membru governu tomak, halao diskusaun ba jornada Orsamentu Jeral Estadu (OJE) 2024, objetivu atu aumenta kresimentu ekonomiku, hodi fo prioridade ba bem estar no povu nia dezenvolvimentu.
Liu husi Diskursu, Primeiru Ministru (PM) Kay Rala Xanana Gusmão hakarak hatoo gratidaun ba sidadaun Timor-Leste hotu, kontinua apoia no reziliensia, nasaun perkore ona dalan naruk dezde hetan independensia no unidade, ho determinasaun husi povu tomak lori mai too ohin loron.
Atu haklean detalhu husi orsamentu, tenki hanoin hikas prinsipiu orientadores sira, tenki molda desizaun finanseiras, transparensia, responsabilizasaun, inkluzaun no sustentabilidade.
“Prinsipius hirak nee hanesan nukleu husi ita nia governu esforsus ba TL prosperu no harmoniozu. Prinsipal objetivu husi orsamentu atu aumenta kresimentu ekonomiku, hodi fo prioridade ba bem-estar no povu nia dezenvolvimentu, objetivu atu promove, ambiente, laos deit atrai investimentu estranjeiru, maibe mos kria oportunidades ba emprendedores lokais no pequenas emprezas sira”, katak Xefi Ezekutivu, Kay Rala Xanana Gusmão iha nia diskursu, bainhira halao diskusaun ba jornada Orsamentu Jeral Estadu (OJE) 2024, iha Ministeriu Finansas, Aitarak-Laran, Tersa (12/09/2023).
Xanana dehan, bainhira apoia sektores hirak nee bele liberta povu nia potensia no apoia agrikultores sira sei kontinua hanesan prioridade máxima, sei insentiva téknikas agríkolas modernas, apoia kooperativas agríkolas no investe iha investigasaun no dezenvolvimentu hodi aumenta produtividade agrikola no kompetitividade. Aleinde nee, hanesan nasaun rika iha rekursus naturais, dever atu jere rekursus naturais nee ho forma responsável.
Nia afirma, orsamentu inklui medidas hodi hadia jestaun rekursus promove prátikas sustentáveis no investir iha projetus de enerjias renovaveis, tenki protéje ambiente ba jerasaun futuras, garante rekursus naturais bele utiliza ho forma ekonomikamente benéfika no ekolojikamente sustentável.
Hanesan conclusão,Timor-Leste nia orsamentu foun né reflete kompromisu nasaun nia bem estar no dezenvolvimentu. Ho enfoque neebe forti iha kresimentu eknómiku, iha dezenvolvimentu infraestruturas, iha edukasaun iha saude, iha agrikltura no iha jestaun de rekursus, fiar metin kapasidade atu harii futuru neebe prosperu no sustentavel ba sidadaun sira hotu.
Tuir PM Xanana, tenki hanoin katak implementasaun ho susesu husi orsamentu nee ezije kolaborasaun ho envolvimentu husi partes interessadas sira hotu, inklui husi governu, setor privadu, organizasaun husi sosiedade sivil no sidadaun sira, hamutuk, bele hasoru dezafius sira no alkansa vizaun kona ba Timor-Leste ida prosperu. No bele kontinua servisu hamutuk fo liman ba malu ba futuru ida neebe nabilan liu.
(gui)
