IX Governu Sei Responsabilidade Sasan Folin Sae

DILI, STLNEWS.co – IX Governu neebe forma husi Partidu CNRT ho PD sei responsabilidade boot ba sasan folin sae, neebe implika ba povu Timor Leste (TL).

Deputada CNRT Bendita Magno hatete, governu ida nee sei responsabilidade boot ba sasan folin sae. Tanba nee, IX Governu bainhira forma sei aprezenta programa nee, sei liga mos ba situasaun neebe mak povu hasoru.

“IX Governu sei rezolve sasan folin, i ami iha parlamentu, VI Lejislatura haree ba taxa importansaun sae”, katak deputada CNRT Bendita Magno ba STL Segunda (19/06/2023) iha salaun OKA Surikmas, bainhira remata konferensia nasional simu koligasaun PD ba forma IX Governu.

Nia dehan, tanba sasan folin sae preokupasaun povu tomak nian, tanba nee VI Lejislatura mos sei haree ba taxa importasaun neebe implika ba folin sasan sae.

“Ita hatene katak taxa importasaun sae implika mos ba kresimentru ekonomia, liu-liu ba ekonomia povu kbiit laek, tanba susar atu kompras”, tenik nia.

Nia kestiona, taxa sae mos implika ba investor sira labele mai investe, haree situasaun daudaun nee iha loja ka merkadu sasan folin sae makaas.

Tuir nia, sasan folin sae nee ba ema neebe servisu sei iha kbiit sosa, maibe ba povu kiik laiha rendimentu susar atu sosa.

(gui)

LEAVE A REPLY

Please enter your comment!
Please enter your name here