DILI, STLNEWS.co – IX Governu neebe lidera husi Xefi Ezekutivu Kay Rala Xanana Gusmão, daudaun nee tenta buka dalan oinsa bele kria industria iha Timor Leste (TL), tanba iha pontensia ba produtu barak.
Tuir Xefi Bankada CNRT, Duarte Nunes katak, konaba atu harii industria iha Timor Leste, nee IX Governu sei tenta buka dalan,
“ita haree agora PM tenta buka hela dalan, i Xefi Ezekutivu nee mos ita haree sai ba rai liur laos deit ba servisu ida ka rua, maibe iha objetivu barak ba estadu nian, neebe PM buka hela, ita hein deit”, katak Xefi Bankada CNRT Duarte Nunes ba STL, Kinta (21/09/20239) iha PN.
Xefi Bankada CNRT Duarte katak, TL presiza duni industria, tanba iha pontensia boot ba produtu rai laran hanesan, Ikan, Kafe, bele mos naan Fresku, no seluk tan.
Hein katak ho PM neebe tenta buka ba mai nee, loron ida bele hetan dalan i iha ema neebe mai hodi kria industria iha TL.
Tuir nia, fiar katak, loke industria iha TL, bele loke mos kampu servisu ba Timor oan sira. Espera ba oin sei iha indústria boot iha Timor, bele fo mos servisu ba Timor oan neebe dezempregu.
Nunee mos Deputada husi Bankada FERTILIN, Lidia Norberta katak, Timor presiza kria industria, tanba haree ba produtu barak neebe TL iha, tanba nee tenke hanoin oinsa kria industria, hodi prepara antes adere ba ASEAN, Timor oan mos iha kapasidade no matenek iha kompetisaun, adere ba ASEAN adapta merkadu livre, TL mos preparadu no iha indústria neebe bele kompete mos ho nasaun seluk.
Entretantu, Xefi Bankada KHUNTO Olinda Guterres katak, Timor nee presiza duni, tanba povu sira tau fiar ba IX Governu liu husi PM, atu bele kria duni hodi garantia mos oinsa fo servisu ba Timor oan sira.
(gui)
