Japaun Nafatin Fornese Fundu Asistensia Ba Konstrusaun Aeroportu Komoro

DILI, STLNEWS.co – Governu Japaun desidi nafatin fornese fundu asistensia ba Governu Timor Leste, hodi halo konstrusaun ba Aeroportu Internasional Nicolao Lobato Comoro.

Lia hirak nee hatoo husi Embaixador Japao iha Timor Leste, Kimura Tetsuya ba jornaliata sira bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Kinta (18/01/2024).

Nia hatete, Japaun nafatin apoiu fundu hodi halo konstrusaun ba Aeroportu Nicolao Lobato.

“Hau komprende katak sei iha revizaun ba projetu ida nee husi Governu Timor Leste i Japao desidi ona nafatin fornese fundu asistensia ida nee ba harii terminal pasajeiru nia ba iha Aeroportu Nicolao Lobato, ami Governu Japaun sei hein ba proposta, ida nee atu kontinua halo diskusaun sobre harii no kontinua projetu ida nee,” katak embaixador.

Aleinde nee, embaixador mos altualiza ba Prezidente Republika konaba relasaun bilateral no kooperasaun entre Timor Leste ho Japaun no embaixador hatoo obrigadu agradesimentu ba PR konaba solidaridade no simpatia neebe hatudu husi Governu Timor Leste ba vitima sira neebe afeitadu husi teramoto ka rai nakdoko iha Japaun iha inisiu tinan ida nee.

“Hau mos foti oportunidade ida nee atu espresa apresiasaun senseru ba Parlamentu Nasional, Governu Timor Leste no povu Timor Leste konaba solidaridade no simpatia neebe sira hatudu ba vitima sira neebe afeitadu husi rai nakdoko iha Japaun,” katak nia.

Iha fatin hanesan, Prezidente Konsellu Administrasaun Fundu Infraestrutura KAFI, Gastao de Sousa hatutan, konstrusaun ba Aeroporto Nicolao Lobato agora suspende, kerdijer laos hapara, tanba nee sira sei observa hela hodi hatoo ba Primeiru Ministru, nunee governu bele foti desizaun.

“Se pending ou suspende, kerdijer la para, iha asuntu balun ke ami sei haree hela, foin loron rua ba ami sei haree hela, hau ho hau nia membru haree hela asuntu nee hodi hatoo ba Primeiru Ministru para governu bele foti desizaun,” katak nia.

Aleinde oinsa ho reablitasaun estrada ba Munisipiu Aileu neebe paradu, nia prosesu oinsa, hatan ba kestaun nee, Gestao hatete, la kansela no la suspende no prosesu lao hela, no pagamentu adiantamentu selu ona, entaun kompanhia tenki kontinua lao.

Prizidente Republika Jose Ramos Horta hatete, nia hakarak konstrusaun Aeroportu Internasional Prezidente Nicolao Lobato Comoro tenki realiza, tanba aeroportu hanesan odamatan ba vizitante sira.

(eme)

LEAVE A REPLY

Please enter your comment!
Please enter your name here