HATUDU, STLNEWS.co – Prezidente Partidu CNRT Kay Rala Xanana Gusmao ho Sekretariu Jeral Francisco Kalbuadi Lay hasoru Vitima joven nain rua hodi fo solidariedade, hafoin hetan tuda kanek husi militante partidu balun, bainhira joven nain rua hamutuk ho militante CNRT sira seluk fila husi kampanha aberta iha Ainaro Vila.
Hafoin hasoru joven nain rua neebe hetan tuda iha area Casa, Xanana apelu ba militante hotu atu labele responde ba kualker provokasaun husi partidu adversariu iha tempu kampanha eleitoral.
“Husu imi hotu labele responde ba kualker provokasaun neebe sei la fo benifisiu ba ita, mantein kria pas no estabilidade, tanba ita iha autoridade kompetente atu haree ba kriminozu sira,” dehan Kay Xanana Gusmão ba militante sira iha mini kampanha Partidu CNRT neebe realiza iha Postu Hatudu, Ainaro, Segunda nee (1/5/2023).
Entretantu, iha mini kampanha nee Segundu Visi Prezidente CNRT “Gil Oan Soru” husu ba lideransa partidu hotu atu eduka nia militante sira, respeita partidu sira seluk nia liberdade lao ba mai.
“Lideransa neebe edukadu no hatene kontrolu ba nia militante, favor eduka lo-loos nia militante sira atu labele sai fali krimozu, estraga ema seluk nia liberdade, se lae ema dehan lider nee mos kala kriminozu ida mak mai harii fali partidu, ita nia nasaun sei nakonu ho ema kriminozu, kuandu nia lider sira la tau matan ba nia militante,” dehan Oan Soru iha mini kampanha.
Akontesimentu nee akontese iha Area Raedo, Hatudu, Ainaro, daudaun nee estrutura Partidu CNRT Ainaro hatoo ona keixa ba Komando PNTL Munisipiu Ainaro, hodi submete ba prosesu investigasaun..
(cri)
