DILI, STLNEWS.co – Deputadu sira iha Parlamentu Nasional (PN) kontinua husu sidadaun Timor oan, bainhira atu ba buka servisu iha rai liur tenki buka informasaun klaru, atu nunee too iha neeba labele sai vitima.
Kestaun née hatoo husi Visi Bankada FRETILIN, Deputada Josefa Álvares, katak sai ba liur nee direitu sidadaun idak-idak nian, maibe bainhira ba liur servisu mos tenki tuir ezijensia neebe mak iha rai liur husu, hanesan simu osan boot, maibe servisu mos tenki tuir osan boot neebe simu.
“Molok atu ba tenki buka no husu informasaun diak, mezmu ba pesoal, maibe tenki hatene didiak, atu nunee too iha neeba labele sai vítima,” dehan Deputada Josefa Álvares ba STL liu husi telefone, Segunda nee (25/07/2022).
Tanba nee tuir nia, tenki husu informasaun diak, i posivel bele ba husu mos iha Ministeriu Negosiu Estranjeirus no Kooperasaun (MNEK ), atu nunee husu tuir konaba ajensia sira neebe fasilita sira.
Nunee mos Visi Bankada CNRT, Deputadu Patrocíno Fernandes hatete, konaba kestaun ida née, hanesan media sira akompanha, CNRT sempre hatoo preokupasaun sira nee, tantu liu husi intervista ka plenaria, Bankada CNRT preokupa joven sira barak mak sai ba buka servisu.
Iha Parte seluk, eis Deputadu PD, Ete-Uco Guterre hatete, “Ita Timor oan sai ba buka servisu iha rai liur nee diak, tanba aleinde sira ba buka servisu hetan osan hadia família uma laran, maibe sira mos hetan esperiensia barak”, katak nia.
Nia lamenta, sira ba nee tanba Timor laiha kampu servisu, mezmu sira nee remata universidade, maibe hakarak ka lakohi sira tenki sai ba liur, tanba iha Timor nee kampu servisu la too atu akumula Timor oan sira.
(gui)
