Kada Loron Ema Mate, Governu Tenki Asumi Responsabilidade

DILI, STLNEWS.co – Problema saude publika iha Timor Leste (TL) halo ema kada loron mate, tanba laiha aimoruk no ekipamentu atu halo atedimentu, nunee husu IX Governu tenki asumi nia responsabilidade.

Tuir Xefi Bankada FRETILIN, Aniceto Guterres katak, moris iha TL senti la seguru atu bele salva ema nia vida, bainhira derepenti moras ka hetan atakasaun hanesan saida mak akontese ba Ministru Justisa iha loron hirak liu ba. Se membru governu ida hetan atake kardiaku iha kapital Dili, no iha kedas maluk membru governu sira seluk nia oin, mais la konsege salva ninia vida. Se membru governu mak hanesan nee, satan povu ka sidadaun baibain neebe hetan atakasaun iha area remotas ka fora husi sidade Dili.

Tanba Bankada FRETILIN iha deklarasaun anterior hatete, liafuan deskonfia governu liu husi MS ho propojitu atu oho povu liu husi reventa tiha sistema saude publika, neebe povu kbiit laek sira tau esperansa ba, tanba mediku senior ida iha HNGV lamenta ba Bankada FRETILIN dehan, situasaun agora iha HNGV hanesan planu anikilamentu ka pembunuhan, ema hotu hatene atendimentu ba moras sira lao rotinidade, tanba moras sira iha hela deit, durante nee fatin balun pesol saude la too, maibe hapara tiha profisional saude sira sem iha substitui.

“Entaun iha pontu rua mak ami dehan, se laos vigansa politika entaun ho intesinalmente hakarak husik povu mate. Ida nee mak sira halo, mais ba ami rua nee hotu, halo vigansa politika depois oho povu. Entaun ba situasaun kolapsu iha sistema saude falta aimoruk no ekipamentu neebe halo ema mate, Bankada FRETILIN hakarak deklara, IX Governu Konstituisonal empartikular ho Ministra Saude mak tenki asumi responsabilidade politika, tantu kriminal nomos responsabilidade politika, tanba povu hili no fo konfiansa ba ita atu ukun ho responsabilidade, katak asumi mos ba saida mak naksalak ka lao lalos, iha tempu badak Bankada FRETILIN sei halo partisipasaun ba Ministeriu Publiku atu imputa responsabilidade kriminal ba Ministra Saude konaba inisius krimi partisipasaun ekonomika i negosiu no krimi sira seluk tan, hotu tiha mak ita boot sira ba defende iha neeba,” dehan nia liu husi deklarasaun politika iha PN, Segunda (22/01/2024).

Nia hatete, imajina servisu saude iha rai laran nee lametavel no ema hotu preokupa, tanba sistema servisu saude sai problema boot no ikus-ikus nee rona ema barak mate iha hospital sira iha rai laran.

Nia afirma, dezde fulan rua ikus nee TL tama ona ba krizi umanidade ida neebe grave no perigu tebes, tanba sistema saude kolapsu no paralizadu hafoin hospital sira iha TL labele hetan aimoruk no ekipamentus medisina sira neebe sufisiente atu kura ema moras sira, situasaun setor saude iha TL nian aumenta sai aat liu tan hafoin iha fim Dezembru 2023, MS hakotu kontratu ba pesoal saude sira neebe durante tinan barak nia laran fo apoiu ba servisu saude iha TL.

Entaun ho desizaun MS halo postu saude, hospital referal no HNGV rasik laiha pesoal saude sira neebe sufisiente atu fo asistensia ba povu TL. Bankada FRETILIN preokupa, tanba menus aimoruk no pesoal saude bele fo risku ba sidadaun sira nia moris, tanba iha probabilidade boot halo numeriu ema mate bele aumenta espesialmente labarik bebe ho ema sira neebe vuneravel sira.

Nia sublina, nudar kompromisu 120 dias IX Governu halo ba povu TL, maibe haree situasaun nee laos tanba inkapasidade husi MS, husi 2018 too 2020 Ministra Elia sai nudar Ministra Saude iha VIII Governu Konstituisional, nee duni nia hatene oinsa atu halo jestaun ba rekursu neebe iha, nia konhese diak sistema saude ho diak, no nia mos hatene lei aprovizionamentu konaba ajudikasaun direta neebe tenki kompanhia neebe iha esperiensia iha area refere.

Entaun Ministra saude bainhira asumi kargu nia hatene ona katak, stok aimoruk kritiku ona iha momentu neeba, maibe nia halo nafatin ajudikasaun direita ba kompanhia ida neebe nunka iha esperiensia atu fornese aimoruk, entaun ida nee bele agrava liu tan situasaun no hamosu konsekuénsia fatal ba sistema saude.

(dom)

LEAVE A REPLY

Please enter your comment!
Please enter your name here