DILI, STLNEWS.co – Ministru Justisa promete ona katak, fim husi fulan Setembru kaderneta pasaporte sei mai too Timor, tanba nee sosiedade sira konsidera, promesa nee nudar kompromisu ida.
Tuir Jurista Sergio Dias Quintas katak, espera deklarasaun neebe Ministru Justisa hatoo bele sai realidade, atu iha fim de Setembru nee, kaderneta bele too iha Timor, hodi responde ba proekupasaun sosiedade sira nian.
“Ita espera katak kaderneta pasaporte bele too iha fim de Setembru, tanba kestaun ida nee sai nudar prioridade no kompromisu husi governu ida nee,” dehan Jurista Sergio Dias Quintas ba STL iha tribunal, Kuarta (26/09/2023).
Nia hatutan, Ministeriu Justisa deklara ona ba publiku katak, pasaporte sei too iha fim de Setembru. Tanba nee ema hotu nia hakarak mak pasaporte nee bele too lalais iha Timor, atu bele fasilita sidadaun sira nia deslokasaun ba estranjeiru.
Iha fatin ketak, Akademiku UNTL, Rafael Dr Jesus dehan, promesa neebe Ministru Justisa hatoo ona bele sai realidade, atu tulun ema hirak neebe oras nee presiza hela atu halo tratamentu ba sira nia pasaporte.
“Hau hanoin importante duni konaba kestaun pasaporte nee, ita hein katak saida mak Ministru Justisa hatoo ona bele sai realidade, hodi responde ba preokupasaun sosiedade sira nian,” dehan nia.
Nia afirma, kestaun pasaporte sai preokupasaun ema hotu nian, tanba pasaporte laiha, afeta mos ba ema hirak neebe hakarak ba rai liur, liu-liu ba pasiente sira.
Akademiku nee dehan, husu Ministeriu Justisa atu bele buka soluasaun ba kaderneta pasaporte, tempu badak bele too iha Timor hodi responde ba preokupasaun sosiedade sira nian.
(ter)
