DILI, STLNEWS.co – Relasiona ho informasaun katak, Sekretariu Jeral Partidu Demokratiku (PD) Antonio da Conceição “Kalohan” naran latama lista, ida nee lalos, Sekretariu Jeral ho prezidente naran nafatin primeiru iha lista PD ba eleisaun parlamentar 2023.
Kestaun nee hatoo husi Seketariu Jeral PD, Antonio da Conceição Kalohan katak, lista PD nian ba eleisaun parlamentar nee, lista oin foun barak. Ho hanoin katak hakarak atu hasae kadeira, neebe prioridade fo ba iha munisipiu sira, neebe ho votus barak liu, maibe lista nee nafatin lidera husi prezidente partidu nomos Sekretariu Jeral.
“Maibe ami mos halo akordu para depois prezidente ho Sekretariu Jeral tempu ona atu halo kadernizasaun politika ba estrutura, tanba nee iha eleisaun lista nee nafatin prezidente ho Sekretariu Jeral uluk. Depois de eleisaun ami nain 2 sei halao knaar seluk hodi fo espasu atu kandidatu sira seluk, neebe tuir lista bele substitui ami,” katak Sekretariu Jeral hanesan mos Xefi Bankada PD Antonio da Conceição ba STL, Tersa nee (04/04/2023) iha PN.
Nia dehan, halo ida nee hodi fo garantia ba munisipiu sira bele lori nafatin lian munisipiu, maibe atu halo mos buat neebe bele favorese ba munisipiu nomos ba populasaun iha Timor.
Nia informa, sira hanoin atu fo fatin ba kandidatu foun, neebe depende se iha konfiasa seluk neebe atu fo mos ba PD atu halao misaun foun ruma iha PN sira sei desidi, maibe karik iha internamente sira iha ona akordu.
Se enkuantu partidu balu manan maioria atu ba ukun konvida PD, ida nee atu dehan katak PD tenki ba ukun, atu nunee halo normalizasaun ba situasaun politika neebe mak lao i aumezmu tempu mos bele kumpri misaun ida neebe mak sei falta atu lori servisu ba povu.
Iha parte seluk, Visi Bankada FRETILIN, Josefa Alvares hatete, sira nian FRETILIN iha lista tuan no lista foun, lista tuan nee hakarak kontinua hanesan memorizasaun institusional, neebe balu mantein, maibe mos iha lista foun mos iha.
Etretantu, Xefi Bankada CNRT, Duarte Nunes hatete, ba iha Partidu CNRT iha lista tuan ho lista foun mistura, neebe laos deit lista tuan, maibe foun mos iha ba eleisaun parlamentar 2023.
(gui)
