Kalohan Obrigasaun Kumpri Desizaun Tribunal, Rekursu Bele Suspende

DILI, STLNEWS.co – Relasiona ho desizaun tribunal kondena Antonio da Conceição “Kalohan” nudar eis Ministru Komersiu no Industria, pena prizaun tinan 5, tanba nee nudar sidadaun iha obrigasaun kumpri desizaun, maibe se iha rekursu husi advogadu bele suspende.

Tuir Deputadu Bankada FRETILIN, atual membru Komisaun A Trata Asuntu Konstituisaun no Justisa, Joaquim dos Santos katak, tuir artigu 16 Konstituisaun Republika, sidadaun hotu hanesan iha lei nia okos, iha obrigasaun hanesan no iha dever hanesan, ida-idak responsavel ba nia aktus tuir lei.

“Iha ita nia sistema justisa, sistema sivilista, tribunal reprezenta povu foti desizaun em nome estadu, neebe tribunal desidi ona laiha orgaun soberanu ida, nia autoridade boot liu kompetensia tribunal”, katak Deputadu FRETILIN Joaquim dos Santos ba STL via telefone iha Dili, Sesta (12/01/2024).

Nia dehan, sidadaun hotu iha dever atu kumpri tribunal nia desizaun, bainhiratribunal desidi kumprimentu de pena, neebe sidadaun kiik ka boot tenki kumpri. Liga ba ema sira hanesan membru orgaun soberanu nee prosesu ketak, tuir konstituisaun iha artigu ida, nia parte ladun lembra, bainhira hetan kondenasaun menus husi tinan 2 mak halao hela funsaun ida nee, bele husu permisaun ba PN halao levantamentu ba imunidade, maibe liu husi tinan 5 ba leten hanesan Antonio da Conceição nian tinan 5, nee kumpri automatikamente disizaun nee. Agora nia nudar deputadu sesante, maibe nia nudar deputadu atual mos desizaun pena menus husi tinan 2 sei hasai ka levantamentu imunidade, maibe tinan 5 nee automatikamente ba kumpri desizaun tribunal.

Deputadu nee esplika, ba kazu Antonio nian nee orgaun kompatente tenki kumpri desizaun tribunal, tanba nee Prezidente Republika no Primeiru Ministru tenki asumi responsabilidade ba nomeasaun nee, se nudar sidadaun Antonio la mai kumpri, PR ho PM tenki asumi responsabilidade ba nomeasaun nee, neebe tenki halo fali nomeasaun ema seluk ba troka Antonio, nee tuir lei.

“Nee desizaun orijinal, tenki kumpri, enkuantu seidauk iha rekursu tenki kumpri, maibe se iha rekursu entaun bele suspende kumprimentu nee, i rekursu nee mai husi advogadu Antonio nian, maibe advogadu mak la hatoo rekursu, hakarak ka lakohi Antonio tenki kumpri desizaun tribunal”, tenik Joaquim.

Lejislador nee akresenta, rekursu neebe hatama nee parese 15 dias, husi desizaun tribunal nee tuir prazu legal, se laiha rekursu PM ho PR tenki halo nomesaun foun.

Nia afirma, se iha rekursu husi advogadu, entaun bele suspende ba pena nee, tanba rekursu barak tama iha tribunal, la ohin tama aban desidi kedas, maibe sei lori tempu, tanba depende rekursu sira neebe mak urejensia no la urjensia nee kompetensia tribunal.

Entretantu jornalista koko konfirma ho Xefi Bankada PD, Manuel Noronha, maibe nia parte laiha komentariu.

(gui)

LEAVE A REPLY

Please enter your comment!
Please enter your name here