Kampanha Ba Dala Ikus, Lere Fiar FRETILIN Sei Manan Iha Elpar

DILI, STLNEWS.co – Bainhira iha ambitu kampanha FRETILIN nian ba dala ikus iha Postu Administrativa Nain Feto, Munisipiu Dili, Lideransa Troika, Lere Anan Timur fiar FRETILIN ho numeru sorteiru 11 sei manan iha eleisaun parlamentar (Elpar) tinan nee, tanba haree ba entuziasmu povu nian neebe fila hikas ba uma lisan FRETILIN.

“Hau fiar ita sei manan iha 21 Maiu ida nee, kombate boot se agora imi hotu hotu vota ba FRETILIN ita sei manan, maibe Kamarada sira iha nee sorin deit mak vota ita sei laman, tanba nee iha loron 20 kalan vizilansia, se mak fo osan simu tiha deit, uluk Indonezia mos hanesan hakarak sosa kotu imi nia klmar imi la fo, neebe hanesan mos agora   se mak fo osan simu tiha deit maibe vota ba FRETILIN,” hatete Lere iha kampanha ba dala ikus FRETILIN nian, iha Postu Administrativa Nain Feto, Munisipiu Dili, Kinta (18/05/2023).

Iha biban nee mos Lere  hamulak ba matebian no Maromak atu haraik tulun ba Partidu FRETILIN bele manan iha eleisaun Parlamentar tinan ida nee, nunee bele kore povu husi kiak no mukit. “Ita nia kampanha ikus mak ida nee ita husu ba ita nia matebian sira, Maromak atu bele tulun ita nafatin iha 21 Maiu ita tenke mana hodi ukun para kore povu husi kiak no mukit,” dehan nia.

Nia dehan, Avo Nana ohin (Kinta-red) halo kampanha iha Tasi 3 dala ruma imi fila imi hasoru malu, se FRETILIN mak simblu unidade nasional, nain ba estabilidade ema ruma provoka fo deit obrigadu, tanba ema neebe brani nee nia tauk ten, kuandu situasaun diak mak hatudu nia brani mas uluk situasaun la diak nia tauk ten.” imi jerasaun FRETILIN ita brani nanis kedan, ema ida labele hanorin ba imi konaba  brani, maibe brani iha fatin agora laos atu brani tuku malu, uluk mak imi se imi nia hirus matan ba inimigu, maibe agora tenke hamutuk para dezenvolve nasaun nee ba oin,” tenki Lere.

Membru segunda jerasaun FRETILIN nee nafatin enkoraza militante no simpatizante FRETILIN tenki kuidadu ho politika sira seluk, tanba iha dalan demokrasia politika barak mak halo propaganda iha povu nia leet iha tempu kampanha eleitoral.

“Ohin loron politika bobar, politika bosok mak barak, bainhira kampanha manan hotu hau dehan katak, hau ba ukun sei hadia povu nia moris, nee bosok ita hanesan lider, hanesan responsabel ba vida nasaun nian ita tenke kolia loloos,”hatete lideransa troika FRETILIN nee.

Iha fatin hanesan, Jose da Costa hanesan militante hatete, iha eleisaun 21 Maiu agora sira sei vota ba programa, laos figura, tanba figura la fo moris ba ema maibe programa.” Ami sei vota ba programa, laos vota ba figura tanba figura nee mak atu fo moris diak ba ema, maibe programa hanesan sesta bazika, uma naroman ba povu, subsidiu US$ 200 no seluk tan,” hatete Jose.

(car)

LEAVE A REPLY

Please enter your comment!
Please enter your name here