DILI, STLNEWS.co – Partidu CASDT abertura kampanha dahuluk iha Taibesi, kompromisiu foka liu ba ema sai fundamental dezenvolve iha area hotu, foka mos ba iha setor non petroliferu, agrikultura no turizmu.
Kestaun nee hatoo husi Sekretariu Jeral CASDT, Gally Soares Araujo ba jornalista sira iha Taibesi, Kuarta nee (19/04/2023).
Nia dehan, CASDT kompromisu ida foka liu ba ema, liu-liu kualifika ema sai baze fundamental atu dezenvolve iha area hotu-hotu, foka mos ba iha area hanesan setor non petroliferu, agrikultura no turizmu.
“Agrikultura transforma sai produtu neebe bele eskporta ho diak iha nivel internasional, hodi aumenta reseita ba iha ita nia nasaun, turizmu ema hotu hatene katak, turizmu nudar industria neebe transversal, industria neebe luan tebes, kobre area hotu-hotu iha Timor, ita nia rain mos natureza hatudu katak bele moris ho trenu, ami hakarak foka oinsa atu dezenvolve ita nia ema, ita nia infraestrutura bazika sira bele apoiu ba turizmu.
Tanba turizmu sai hanesan alternativa ekonomika iha tempu naruk no fo sustentabilidade, tanba liga mos turizmu iha area seluk, komersiu industria nomos servisu no teknolojia, tanba teknolojia hanesan baze ida atu komplementa industria sira seluk no oras nee daudaun eziste iha Timor, nunee fiar katak ho kamada joven aprezenta kuaze 75% joven deit, Timor iha obrigasaun tomak atu tau matan ba joven sira.
CASDT analiza liga ho governasaun durante tinan 20 nee, ita mos apar planu estratejiku, iha neeba identifika katak, buat barak afeita ba hahalok, neebe mak tuir lolos lao i la konsege lao, atraza sira neebe identifika hanesan, oinsa bele halo reforma ida atu hadia liu tan sistema administrasaun publika liu-liu ba gastus neebe mak ema hotu katak, fundu petroliferu menus ba beibeik, industria kosta sul mos eziji ezersiu boot atu halo investimentu iha Kosta sul.
Maibe la haluha katak, iha industria kiik hamoris ekonomia nasional liu-liu iha kapital Dili mak reprezenta moris fatin ba industria nomos ekonomia formal, liu-liu ba setor privadu nasional, tanba Dili sentraliza buat hotu-hotu, ema barak servisu iha nee, maibe desorganizasaun neebe identifika liga ho industria komersiu, setor privadu nasional hetan mos krizi nia laran atu bele kria sustentabilidade ba sira nia aan rasik.
Tuir observasaun STL iha Taibesi, kampanha dahuluk nee observasaun husi CNE, STAE, Sosiadade Sivil no seguransa husi PNTL.
Tuir orariu kampanha halao tuku 10.00 dader, maibe realidade nebee akontese iha fatin kampanha hahu iha tuku 01:38 meudia, remata iha tuku 02.50.
(joa)
