DILI,STLNEWS.co – Tempu kampanha Partidu politika sira balu fahe sasan no osan, asaun ne’e eduka no hamate liberdade povu.
Tuir Deputadu husi Bankada PD, Antonio da Conceicao, maski partidu balu ukun hela lori sasan ba fahe, ne’e uza sala osan povu, devia uza osan ne’e ba dezenvolvimentu povu nian hodi hanoin moris, laos ohin, maibe sei iha futuru, neebe koalia konaba sustentabilidade dezenvolvimentu nian.
Maibe lori sasan no osan ba sosa povu, ida ne’e hamate povu nia liberdade, la eduka povu, atu nia bele senti katak hanesan sidadaun responsabilidadee nee saida, tenki kontribui ba buat ne’ebe diak.
“Konserteza aktus sira ne’e atu sosa votus, maibe hamate povu mos nia liberdade”, katak Antonio da Concenicao, ba STL iha PN, Segunda ne’e (08/05/2023).
Nia dehan, maski sira fo osan no material, maibe povu tenki hanoin ona votus sentidu ne’e rasik, uluk atu lori nasaun ba diak, maibe realidade nafatin deit, i agora aat liu tan tanba kaderneta pasaporte deit mos la diak, ida ne’e tenki hanoin katak uluk promete la halo, agora tenki desidi fali partidu seluk hodi ba ukun.
“Vota ho konsiensia, laos tan osan ka sasan ne’ebe mak simu ona iha tempu kampanha, hili diak atu nune’e partidu nee ukun hodi servi fali povu”, tenik nia.
Nune’e mos Deputadu Bankada CNRT, Domingos Carvalho katak, oras ne’e parpol balu lori sasan no osan ba fahe iha tempu kampanha, loos ne’e opozisaun mak ba fahe sasan ne’e lojika, maibe CNRT seidauk fahe, nusa mak partidu balu ukun hela mak ba fahe fali sasan ho osan, asaun buka votus, tanba kaer governu, mandatu hotu, maibe iha periodu kampanha foin hanoin atu fahe.
“Lo-loos ne’e sei ukun ne’e tenki fahe ona, laos too iha kampanha mak foin buka atu fahe sasan osan,” dehan nia.
Maibe CNRT mos tun ba terenu hatete ba povu sira katak, partidu se deit mak lori sasan no osan mai simu, maibe vota ho konsiensia, atu nune’e hili partidu ne’ebe mak merese atu ba ukun.
Entretantu, Visi Bankada FRETILIN Antoninho Bianco hatete, tempu kampanha ema fahe sasan ho osan, ne’e ita la hare, maibe balu dehan akontese, ami mos rona katak ema balu fo bandeira ho osan, maibe laiha evidensia, neebe atu hatete klaru ne’e so ema nain rasik mak deklara.
Tuir nia, parpol ne’ebe halo buat ne’e tanba toman ona, maibe FRETILIN la halo ida ne’e, iha konsolidasaun ami halo hodi apoia hanesan dada bee moos, no apoia seluk tan, maibe halo ida nee iha momentu konsolidasaun, iha kampanfa FRETILIN halao.
(gui)
