Kampanha Ikus CNRT, Xanana Husu Vota CNRT Salva Estadu

DILI, STLNEWS.co – Kampanha ikus komisiu Partidu CNRT iha Tasi Tolu nakonu ho militantes no simpatizante, Xanana husu vota CNRT numeru 12 hodi salva Estadu RDTL.

Prezidente Partidu CNRT Kay Rala Xanana Gusmão hatete, mai hamutuk ho CNRT atu salva direitu demokratiku, estadu ida nee iha airin 4, tinan 5 gasta bilhaun US$ 11 maibe laiha rezultadu, tanba nee mai hamutuk ho CNRT, hili CNRT hodi salva estadu ida nee.

Tuir nia, iha tinan kotuk hili ona PR, maibe tenki iha governu neebe forti, i laos ho ministru barak hodi tur deit, maibe tenki hatene ba kaer governu.

“Ohin hau kontenti, ita mai Tsunami tiha iha Tasi Tolu, tanba lakohi ona atu haree ema estraga povu nia osan”, katak Prezidente Partidu CNRT, Kay Rala Xanana Gusmão iha kampanha ba dala ikus iha Dili Tasi Tolu, Kinta (18/05/2023).

Xanana hatete, ema dehan CNRT tinan 10 gasta bilhaun US$ 10 dehan la halo buat ida, maibe estrada, eletrisidade mosu rasik deit, kaer governu tinan 5 gasta bilhaun 11, rezultadu laiha, tanba nee mai hamutuk salva estadu demokratiku nee.

Xanana kestiona, osan ba sesta bazika fo han kompanhia, depois relatoriu iha Administrasaun Estatal, ikus sunu.

Governu agora laiha planu, kondisaun estrada la hadia, derepente deit mosu uma naroman, maibe uma naroman nee servi partidu laos povu. Kontinua promete fo osan US$200, nee mak atu hadia povu nia moris, agora aimoruk laiha maski osan 11 bilhaun iha ukun tinan 5.

Iha dia 21 Maiu, Xanana husu atu militantes, simpatizante hili numeru 12, se numeru 12 manan maioria absoluta sei halo investigasaun no auditoria ba povu nia osan neebe durante sira gasta.

CNRT atu halo iha tinan 5, tanba PED paradu iha 2027 mai too agora, tanba nee sei hadia tiha desentralizasaun, katak atu hakbesik governu ba povu, ho nunee ba munisipiu atu idak-idak mak toma konta.

CNRT manan sei ba iha munisipiu, nunee fo ba jerasaun foun sira ka joven sira iha munisipiu rasik, laos nee deit maibe presiza haree ba iha peskas, pekuari, agrikultura no seluk tan.

Neebe setor ekonomia sei deskute iha munisipiu ida-idak atu nunee haree oinsa hasae produsaun sira, osan nee tama iha povu nia liman, laos osan semo hotu ba rai liur.

Xanana husu, ba universidade tenke iha kualidade, tanba prepara joventude ba futuru prepara aan rai ida nee futuru mak joven.

Tanba nee vota ba CNRT vota futuru, liu-liu joven sira, neebe bainhira CNRT sae ba ukun hadia hotu buat naksalak sira no hamos foer sira, depois mak fo ba jerasaun foun atu haree fali ba rai ida.

Entretantu, Koordenador Partidu CNRT, Munisipiu Dili, Luis Silveiro, hatete, Dili Tasi Tolu Tsunami, iha eleisaun Prezidensial apoia ona Ramos Horta ba PR, tanba nee iha eleisaun paralamentar tenke servisu makas, atu CNRT tenke manan.

Tanba nee Dili tenke sapurata, hodi vota ba CNRT, manan atu ukun.
Entretantu observasaun STL haree katak, kampanha ikus partidu CNRT, iha Tasi Tolu, militantes no simpatizantes antusiazmu, simu Prezidente partidu CNRT Kay Rala Xanana Gusmão, no militantes no simpatizantes nakonu, susar halo movimentu, mezmu loron manas maibe lasente kolen, sira kontinua halilar viva CNRT, viva Xanana.

Mezmu rai manas makas, susar book aan, maibe husi parte bombeirus rega bee, atu nunee militantes no simpatizantes sira hetan netik malirin.

Enkuantu, estrada publiku sira tuir STL haree katak, mosu engarrafamentu makaas, maski iha polisia tranzitu sira no polisia husi unidade seluk tan, hodi fo regras atu lao tuir dalan, maibe mosu nafatin engarafamentu, tanba transporte neebe movimentu kuaze mesak militantes no simpatizantes CNRT, hodi ba partisipa kampanha.
Entretantu husi parte tasi laran, bero sira mos nakonu neebe hasae bandeira CNRT no bandeira RDTL.

Iha kampanha nee laos deit bandeira CNRT ho CNRT, maibe bandeira husi partidu kiik sira husi Frente Mudansa, Partifor no CASDT, maske Partidu CASDT rasik sei kompete mos iha eleisaun parlamentar, maibe iha kampanha ikus CNRT, CASDT sira partisipa, husi Sekretariu Jeral Gally Soares. Laos nee deit, maibe partisipa husi grupus, movimentus oin-oin hodi apoia ba CNRT.

Maski loro manas, militantes no simpatizante sira la senti kolen, nafatin firmi hodi hakilar Viva Xanana, viva CNRT. Iha okaziaun nee Prezidente Partidu CNRT Xanana mos fahe bee no aifuan sira neebe mak negosiantes aileba sira faan ba iha militantes no simpatizante sira.

(gui)

LEAVE A REPLY

Please enter your comment!
Please enter your name here