DILI, STLNEWS.co – Xave importante atu labele insulta no hatun malu iha kampanha mak labele hamosu lianguajen provokativu.
Tuir Deputadu Bankada CNRT, Arão Noé katak, konaba politika, iha dia 19 tama ba periodu kampanha nian, i agora iha hela faze konsolidasaun, iha mensajen barak mak hatoo husi lider sira ba partidu hotu katak, iha kampanha hatoo mak programa, politika atu halo iha futuru karik manan. Maibe labele kampanha hamosu linguajen provokativu hodi insulta no hatun malu.
“Importante atu labele insulta no hatun malu mak labele iha provokasaun, tanba iha parte ida hahu provoka ida, parte seluk tenki resposta hodi klarifika”, katak eis Prezidente Parlamentu Nasional, Deputadu CNRT Arão Noé ba jornalista iha PN, Kuarta (12/04/2023).
Nia dehan, media mos tenki justu iha reportajen, tanba iha parte balu mak halo provokasaun liu husi linguajen mak publika ona, labele haluha ida seluk nia resposta, atu nunee bele iha ekilibriu.
Husu ba media sira tenki hatoo reportajen ekilibriu iha eleisaun bainhira iha linguajen provokasaun.
Nunee mos Visi Bankada FRETILIN, Antoninho Bianco hatete, tama ba kampanha, tuir los nee partidu sira ba hatoo programa, programa saida mak halo ona, programa saida mak seidauk halo atu halo, tanba nee labele insulta malu.
“Oras nee ita bele dehan, debate oras nee lao barak ona, mezmu seidauk kampanha hahu tiha ona insulta malu no hatun malu”, katak Bianco.
Nia katak, tuir los atu ba ukun ema nee laos ba koalia fali insulta malu, atu ukun povu nee hatoo programa hodi fo esperansa ba povu, neebe programa deit la too, presiza mos ema neebe mak atu ukun nee too ka lae, laos ba hodi fali ema ida rua mak manan, maibe presiza haree programa neebe iha lao ka lae, diak ka lae, depois povu mak determina liu husi votus.
(gui)
