DILI, STLNEWS.co – kampanha lider partidu politiku sira diak liu hatoo mak planu no programa ba tinan 5, se buka insulta malu, trata malu, la hatudu maturidade politika ba povu.
Kestaun nee hatoo husi Amu Paroku ba Parokia Nossa Senhora da Graca Hatubelico, Padre Francisco Soares Fernandes ba STL liu husi telefone, Kinta nee (27/04/2023).
Nia hatete, oras nee daudaun lider partidu politiku sira halo kampanha hodi hatoo programa no planu hotu no husi konsolida oinsa povu bele simpatia ba partidu idak-idak, maibe iha kampanha insulta malu, la hatudu maturidade politika.
Kampanha nafatin hatudu maturidade politika iha vizaun ba programa sira ba futuru oinsa konsolida didiak povu sira, nunee bele komprende hodi bele hili tuir povu nia konsiensia.
“Kampanha lalaok diak, partidu politiku sira halo mak hatudu sira nia programa partidu nia neebe dezena ona, ida nee mak presiza halo no aprezenta, manifesta no hatudu, presiza esplika atu bele motiva povu bele komprende programa partidu idak-idak nia, nunee bele manan iha eleisaun mai, se sira nia kampanha mak trata malu, insulta malu, kampanha ho manipulasaun, hanesan nee susar, nee la hatudu maturidade politiku,” katak Pe.
Padre hatutan, hanesan ema politika hatudu nafatin maturidade politika, nunee tein didiak programa sira para povu konsumu ho diak.
Bibi Atan kreda katolika nee hatutan, oras nee lider tuan ou libertador sira komesa insulta malu ka trata malu, ida nee kontinua iha kampanha ho idea neebe la konstrutivu, la fo ezemplu diak ba jerasaun foun, no jerasaun foun mos oras nee matenek barak no sira la tuir politiku sira insulta malu nee.
Pe. hatutan, insulta malu hatudu ezemplu ladiak no laiha vantajen, no la fo naroman ba jerasaun atu banati tuir, ida nee frakeza neebe lider tuan sira halo.
“Devia sira kria unidade para hametin estabilidade iha nasaun hodi lori dezenvolvimentu ba oin, maibe sira idak-idak ba gaba aan hodi hatudu liman ba seluk, hau hanoin Timor nee ema hotu luta liu husi votasaun ba indepedensia iha 1999, hatudu momos katak sakrifisiu nee husi kedas kiik too boot, boot too kiik, ema hotu partisipa, ida rua neebe la partisipa ita perdaun, tanba sira la komprende saida mak sira desidi, saida mak sira halo no sira atu lao ba neebe sira la komprende, no oras nee sira komprende ona,” katak nia
Nia mos hatoo mensajen ba partidu politiku hotu katak, halo kampanha nee direitu demokratika nasaun nia, maibe diak liu mak hatoo planu no programa ho vizaun diak ba povu nia diak, no lori povu nee ba hakmatek moris iha propriedade, halakon dezuniaun no diskriminasaun sira para programa mak sai naroman iha povu nia kakutak, hodi desidi iha 21 Maiu ho lo-loos no konsiensia hili ho matenek suporta ba dezenvolvimentu nasaun Timor Leste.
Nunee mos Konselhu Fundador Rede Observador Eleisoens Timor Leste (RONETIL), Laurentino Alves hatoo mensajen ba iha partidu politiku sira katak, tau aas intrese estadu no tau aas intrese povu nia.
RONETIL rekomenda ba iha partidu politiku hotu atu kaer metin unidade nasional hanesan simbolu nasional, nunee labele hamosu violensia ka krimi iha prosesu kampanha no prosesu eleisaun.
“Pensamentu politiku fraku bele sai hanesan tentativa ida ba militante ka simpatizante atu halo krimi, bainhira la simu opiniaun husi parte seluk, tanba nee importante tebes mak partidu politiku idak-idak tenki aprezenta nia planu programa saida mak atu bele konvense militante no simpatizante atu bele kontribui votus ba partidu idak-idak,” katak nia.
Nunee mos Diretor Ezekeutivu Luta Hamutuk, Jose Alves hatutan, partidu politiku nia kampanha oinsa atu sensibiliza hanesan mos parte edukasaun sivika, oinsa povu bele hatene lalaok politika, oinsa bele hatene klean programa esensial sira neebe halo iha tinan 5, sai esperansa ba ukun rasik aan, ida nee laos trata malu hatun malu.
“Trata malu nia benefisiu ba povu laiha, votantes mak tenki kalma, tenki matenek, oinsa atu difini liafuan sira nee labele hamriik hatutan, husik sira koalia ba, depois semana buat nee komesa lakon,” katak nia.
(eme)
