DILI, STLNEWS.co – Tempu badak Kasa Esperansa sei halo fabrika biskuate tradisional, hodi bele kombate mal nutrisaun iha Timor Leste.
Kestaun nee hatoo husi Diretora no Konsultora Kasa Esperansa Madalena Hanjam ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairu Pite, Kuarta (26/04/2023).
Nia hatete, sira nia profesional Timor oan ba iha saude, nunee mos ba iha setor industria, nia hasoru malu ho Prezidente Republika hodi relata asuntu rua konaba kuidadu domisiliariu. Haree ba moras neebe todan tebes karik mate ho dignu, no asuntu seluk mak koalia konaba programa nutrisaun.
“Asuntu segundu ita haree mos ba iha programa nutrisaun, nia parte hanoin para iha mos biskuite tradisional Timor nia, sei iha biskuate ida mak ita sei fornese ba iha Mministeriu Saude, ba inan isin rua sira, labarik idade 5 anos ba kraik no meredar eskolar ajuda tebes atu hatun mal nutrisaun iha Timor Leste,” dehan nia.
Madalena hatutan, planu halo fabrika ba biskuate oras nee daudaun iha hela estudu nia laran, tanba nee sira husu prezidente hodi apoiu mos sira hodi bele realiza fabrika nee iha Timor.
“Estabelesementu fabrika biskuate ida nee sei iha periodu estudu nia laran, ami espera katak iha tempu badak Timor mos bele loke nia fabrika rasik, biskuate forti ba Timor, ida nee iha prosesu estudu mak sei halao no ami halao mos konsulta ho senhor prezidente para fo apoiu ba ami, se biskuate nee mak realiza duni, sei uza produtu lokal vitamina mineral para apoiu ba grupu vuneravel sira neebe mak presiza tebes,” dehan nia.
Karik atu halo fabrika biskuate sei uza produtu lokal saida deit, hatan ba kestaun nee, diretora hatete, iha nasaun barak ho mal nutrisaun neebe mak hanesan Timor no oras nee sira iha hotu ona biskuate mal nutrisaun fortifikadu mak bele uza hanesan batar, bele uza mos aifarina, no bele uza mos marungi, foos.
Nia hatutan, pais neebe mak iha numeru mal nutrisaun barak nee sira sempre iha estok biskuate para bele han direitamente, bele tein no buat hirak nee mos sei konsulta ho Saude Mundial, Ministeriu Saude no seluk tan.
Biban nee, Prezidente Republika Jose Ramos Horta hatete, nia sei fo apoiu moral, no prezidente mos sei haree ba politika no sei fo mos orsamentu oituan liu husi buka dalan, hodi apoiu profesionais sira, nomos oinsa bele fabrika biskuate hodi ajuda kombate mos mal nutrisaun neebe mak aas iha Timor Leste nee.
Prezidente Republika mos sei buka apoiu mos investidor sira, no sei haree mos politika rai laran, husu mos ba governu hodi bele haree no apoiu mos investimentu fabrika biskuate nee iha rai laran.
(eme)
