DILI, STLNEWS.co – Relasiona ho idozu ida neebe ba trata dokumentus ikus mai lakon vida, Ministru Justisa konsidera situasaun nee presiza investiga, tanba sei iha relasaun ho atendimentu.
“Idozu ida mate nee tenki investiga, atu hatene nia mate nee tanba saida, hamrik kleur ka, iha moras ruma. Hau iha liur hela mak rona, maibe agora servisu investigasaun haree hela, atu indentifika,” dehan Ministru Justisa Amandio Benevides ba jornalista iha salaun Ministeriu Justisa, Tersa (15/08/2023).
Nia hatete, iha nee mos sei relasaun ho atendimentu buka atu oinsa servisu sira halo atendimentu nee presiza atu instala sistema apoiu atendimentu, atu bele minimiza ema labele hein kleur liu bainhira trata dokumentus ruma.
Ministru Justisa esforsu hela atu bele hadia sistema atendimentu, iha Dili nomos munisipiu sira.
Iha fatin ketak, PDHJ Virgilio da Silva Guterres dehan, konaba asuntu ida nee sira iha konhesimentu, tristi bainhira rona sidadaun ida mate.
“Provedor lamenta ho situasaun ida nee, ami eziji ba entidade sira atu iha servisu publiku tau prioridade ba iha ema indozu, defisiensia, atu sira labele hein kleur, no sira neebe idade ona bele reprzenta husi familia,” dehan provedor ba jornalista sira iha Kaikoli, Kinta (10/08/2023).
Nia hatutan, orienta ona diresaun relevante fiskalizasaun atu buka hatene pormenores, motivu husi mate nee. Dala ruma indozu ona iha moras, hanesan ema neebe idade ona, tanba nee iha atendimentu tenki tau prioridade ba sira.
(ter)
