Kestaun Korum, PN Kontinua Laiha Plenaria

DILI, STLNEWS.co – Parlamentu Nasional (PN) semana nee laiha sesaun plenaria, tanba kestaun deputadu sira la prienxe korum, preokupa ho atividade kampanha.

Tuir Segundu Visi PN Luis Roberto katak, ohin no horiseik PN la halo plenaria, laiha prezensa deputadu sira nia atu prienxe korum, parese sei iha semana oin.

“Ajenda nee horiseik nian nafatin, konaba servisu intervensaun deputadu sira ba preokupasaun povu, nomos atu aprova akordu konaba servisu aero entre Timor ho nasaun 2, Qatar ho Nova, maibe tanba laiha korum neebe plenaria la realiza”, informa Segundu Visi PN, Luis Roberto ba jornalista sira iha PN, Tersa nee (16/05/2023).

Nia dehan, deputadu sira la prezensa plenaria nee sansaun iha estatutu ho rejimentu preve ona, maibe koalia beibeik atu implementa mos seidauk, neebe fila fali ba bankada idak-idak atu fo hatene ba deputadu idak-idak atu nafatin partisipa iha plenaria, tanba mandatu V lejislatura seidauk remata.

Tuir luis, lo-loos Segunda no Tersa deputadu sira halao plenaria hodi hatoo preokupasaun povu nian, labele abandona fali plenaria.

Entretantu, observasaun STL haree katak, PN semana nee laiha sesaun plenaria tanba laiha korum. Laos nee deit, maibe durante periodu kampanha deputadu sira barak okupadu ho atividade kampanha, tanba nee plenaria iha fulan ida perante kampanha la lao normal, maski deputadu sira mandatu seidauk hotu.

(gui)

LEAVE A REPLY

Please enter your comment!
Please enter your name here