KHUNTO Apoiu Inisiativa CNRT Halo Amandamentu Ba K-RDTL

DILI, STLNEWS.co – Bankada KHUNTO iha uma fukun Parlamentu Nasional (PN) afirma, sei apoiu ba inisiativa CNRT neebe atu halo amandamentu ba Konstituisaun Republika Demokratika Timor Leste (K-RDTL) iha mandatu VI Lejislatura nee.

“Ita haree inisiativa husi Bankada CNRT neebe hakarak halo amandamentu ba konstituisaun, hanoin nee importante tebes, no hau sei hola parte efetiva iha Komisaun A, neebe trata asuntu jurisdisaun importante tebes hodi apoiu haree asuntu ida nee,” dehan Visi Prezidente Bankada KHUNTO, Deputadu Antonio Verdial, Sabadu nee (02/07/2023).

Nia hatete, tanba K-RDTL agora tinan 20 resin ona, neebe presiza haree fila fali ba artigu balun neebe la kondis atu kondus K-RDTL iha parte hotu-hotu, espesialmente ba orgaun soberania 4 iha TL presiza hadia duni.

Nia dehan, Bankada KHUNTO parte iha Komisaun A ho mehi ida atu partisipa efetiva didiak, hamutuk hodi rezolve kestaun importante sira neebe liga ba lei inan baze fundamental nasaun nee nian.

“Maibe liga ba lei hirak neebe la fo oportunidade no fleksibilidade hodi halao ezekusaun orsamental, no halao ezekusaun programa politiku partidu nian nee presiza hadia,” nia sublina.

Ezemplu simples hanesan iha kodigu prosesu penal, kodigu penal, kodigu prosesu sivil no kodigu sivil, iha regras balun neebe tuir lo-loos bainhira iha operasionalizasaun PNTL nee labele halo atua diretamente ba krimi neebe nia haree ho matan.

Nia tenik, entaun dala ruma krimi neebe nia hatene hela, maibe tanba saida buat hotu sei hein orden husi Ministeriu Publiku ka orden husi Tribunal, asuntu ida nee importante tebes tenki hadia iha VI Lejislatura.

(dom)

LEAVE A REPLY

Please enter your comment!
Please enter your name here