DILI,STLNEWS.co – Deputadu husi Bankada KHUNTO iha Parlamentu Nasional (PN) dezafia Partidu CNRT ho FRETILIN atu ukun hamutuk iha governasaun tuir mai, agora la tempu atu insulta malu hodi konsidera malu hanesan busa ho laho.
Kestaun nee hatoo husi Segundu Visi PN, Luis Roberto katak, Timor-Leste nee iha konstituisaun opta sistema multi-partidarizmu, i konstituisaun mos fo dalan ba sidadaun se deit iha direitu atu espresa hanoin, haree mos ba iha kultura Timor presiza respeita malu.
Neebe liu-liu partidu boot CNRT ho FRETILIN, tanba sira nia lideransa kuandu tun ba iha kampanha nakonu ho insulta malu, halo jerasaun foun haree fuan moras.
“Tuir los agora la tempu ona atu insulta malu, neebe ami dezafia atu CNRT-FRETILIN ukun hamutuk, maibe atu implementasaun nee depende ba lider nain 2.
Soke nain 2 nee konsidera malu hanesan busa ho laho nee susar, maski hasoru malu, maibe filosofia politika la kona malu”, katak Visi PN Luis Roberto ba jornalista sira, Kinta nee (13/04/2023) iha PN.
Nia dehan, tuir los sira nudar jerasaun tuan presiza hatudu ezemplu diak ba jerasaun foun atu banati, labele lori insulta malu atu hanorin jerasaun foun sira.
“Lider nee mesak ita nian, tantu Xanana, Mari Alkatiri, maibe sira tun ba baze hatun malu insulta malu, halo ita fuan moras”, tenik Luis.
Nia dehan, nudar jerasaun foun involve iha partidu foun, dezafia Partidu CNRT ho FRETILIN bele ukun hamutuk, KHUNTO ba fali opozisaun mos bele, atu nunee bele haree hodi aprende nafatin husi sira.
Hanesan reprezentante povu husu mos ba juventude sira, liu-liu sira bele hola parte iha estrutura buka oinsa atu partidu rua nee bele hamutuk hodi ukun, karik mos bele hamosu dialogu aberta involve husi partidu sira hotu, atu nunee joven sira hamutuk hodi fo tempu ba partidu 2 nudar aman ba nasaun hamutuk ukun nasaun.
Importante sira hatudu ezemplu diak ba partidu foun no jerasaun foun atu lao tuir sira nia ain fatin.
(gui)
