KHUNTO Fiar CNRT-PD Iha Responsabilidade


DILI, STLNEWS.co – Partidu KHUNTO iha uma fukun Parlamentu Nasional (PN) fo fiar ba Partidu CNRT ho PD neebe forma IX Governu, tanba sira ukun ho espiritu responsabilidade neebe dignu ba povu.

“Ita fo fiar ba partidu rua entre CNRT ho PD, tanba IX Governu sira mak forma, entaun sira iha responsabilidade moral ida neebe dignu, atu fo dezenvolvimentu ho serteza, problema hotu-hotu neebe mak povu hasoru, ita hotu nia preokupasaun, oinsa atu fo solusaun ida dignu ba sira,” dehan Deputadu Antonio Verdial ba jornalista sira iha PN, Tersa (04/07/2023).

Nia hatete, maibe partidu rua entre CNRT ho PD mak halo aliansa hodi ukun IX Governu, fiar katak sei responde ba preokupasaun sosial sira, sempre fo fiar ba governu atual, liu liu IX Governu neebe hahu funsiona nia servisu.

“Tanba nee, ita fiar ba sira sei rezolve ba promisaun politiku sira neebe harii iha sosiedade, tanba entre partidu rua nia objetivu hodi luta ba progresu, no iha figura importante, hanesan Kay-Rala Xanana Gusmao, Mariano Assanami Sabino, Fransisco Kalbuadi Lay, husi lideransa sira nee iha espiritu neebe forti atu ukun duni nasaun no povu,” sublina nia.

Nia tenik, lideransa husi partidu rua nee mai ho nia forsa kapasidade politiku rasik, entaun fiar katak IX Governu Konstitusional sei ukun ida ho responsabilidade laos ho oportunidade husi povu no nasaun nian.

Nia sublina, maski Partidu KHUNTO mai ho kadeira 5 deit, maibe prontu sai opozisaun ida neebe atu servisu duni ba nia povu, no oinsa hamutuk ho bankada governu atu estabiliza pas ba setor dezenvolvimentu iha Timor Leste.

“Ami mai ho partidu ida neebe ho kadeira minimu, neebe sai ba opozisaun ida, maibe ami fiar aan sei hamutuk ho VI Lejizlatura, hodi rezolve problema sosial neebe durante nee karik governu seidauk dezenvolve ho masimum,” dehan nia.

Nia haktuir, esperansa ba politika IX Governu Konstitusional, tanba mai ho lideransa neebe ho espiritu politiku forsa tebes-tebes, sira sei armoniza ba setor dezenvolvimentu publiku ho esfisiente.

Nia hatutan, bainhira espetativa husi Partidu CNRT ho PD la implementa, entaun hanesa bankada opozisaun buka alternativa atu servisu hamutuk ho sira, oinsa bele buka solusaun, hodi fo moris rejiliensia ba sira laos moris mijeravel.

“Destinu povu no nasaun ida atu lao ba oin presiza servisu hamutuk, maski ita mai ho partidu ketak ketak, maibe servisu nudar reprezentante povu, ita presiza hamutuk hodi kria estabilidade nasional ba povu tomak, ida nee mak nasaun no povu nia interese,” hakotu nia.

(gui)

LEAVE A REPLY

Please enter your comment!
Please enter your name here

%d bloggers like this: