DILI, STLNEWS.co – Partidu Kmanek Haburas Unidade Nasional Timor Oan (KHUNTO) prontu apoiu IX Governu Konstitusionál too mandatu remata.
Lia hirak nee hatoo husi Xefi Bankada Partidu KHUNTO, Deputada Olinda Guterres, hafoin remata partisipa iha serimonia tomada de pose ba membru IX Governu iha Palasiu Prezidensial Aitaraka-Laran, Sabadu nee (01/07/2023).
“Ami opozisaun iha parlamentu, maibe ami 100% prontu apoiu IX Governu, maski partidu ketak-ketak, maibe haree ba interese nasional, dezenvolve nasaun nee atu lao, tenki apoiu malu,” dehan Xefi Bankada KHUNTO, Olinda Guterres.
Nia akresenta, iha VI Lejislatura Partidu KHUNTO desidi hili opozisaun iha Parlamentu Nasional, maibe la signifika KHUNTO atu vota kontra programa neebe governu aprezenta ligadu ba povu nia moris.
“Programa saida deit mak governu aprezenta, ami sei la vota kontra too mandatu IX Governu nee remata, naran katak husu ba maun Xanana Gusmão atu lori governasaun too mandatu termina,” dehan nia.
(alb)
