KHUNTO: Rekruta Profesores Tenki Iha Abilidade Edukasional

DILI, STLNEWS.co – Bankada KHUNTO iha Parlamentu Nasional (PN) rekomenda ba IX Governu, halo rekrutamentu ba profesores sira tenki iha abilidade edukasional husi materia oin-oin.

Tuir Visi Bankada KHUNTO, Deputadu Antonio Verdial Souza katak, edukasaun area ida neebe importante no prioridade tebes iha nasaun ida, tanba edukasaun mak save ba prosesu desenvolvimentu nasaun ida nian.

“Nunee rekomenda ba governu atu uza didiak OJE 2024, prepara estratejia ida neebe estratéjiku no efetivu hodi hatan ba situasaun real no halo rekrutamentu ba professores neebe iha abilidade edukasional husi materias oin-oin,” dehan nia liu husi deklarasaun politika iha PN, Tersa (23/01/2024).

Nia afirma, hafanun mos Ministeriu Edukasaun Juventude no Desportu nomos Ministeriu Ensinu Superior Siensia no Kultura atu haree no hadia lei baze de edukasaun (LBE) no reve fila fali kurikulu nasional.

Aleinde nee, haree ba areas tematikas 3 neebe sai prioridades mos, hanesan fasilidades eskola inklui kondisaun infraestruturas, bee no saneamentu, kondisaun dapur hodi responde ba merenda eskolar, kadeiras, meza ba estudantes, kondisaun bibliotekas, edifísius ba administrasaun eskolares, residensias ba professores, nunee mos fasilidade sira seluk.

Tuir rekursus humanus, depois matadalan ba professores, maibe area tolu neebe importante liu mak infraestrutura, fasilidades no dezafius tomak, neebe professores hasoru durante prosesu ensinu aprendizajen.

Tanba haree ba realidades infraestrutura, fasilidades no dezafius, sai fator determinante ba problema hirak neebe mesiona, tanba menus orsamentu, planu estratejia neebe la koresponde ho situasaun real no falta rekursus umanus neebe kompativel.

Nia tenik, fo fila independensia autonomia eskolares sira ninian. Tanba eskola sira mak hatene sira nian nesesidades, ho nunee planu asaun anual nee atu diak liu eskola ida-idak mak halo.

Aleinde nee, Deputada Bankada FRETILIN, Maria Ana Bela Sabio dehan, bazeia ba ME nia planu sei rekruta tan profesores 800 resin tuir nesesidade eskola neebe presiza iha teritoriu tomak, ida nee hanesan politika taka falta deit, tanba sei la rezolve buat ida.

“Hakarak fo ezemplu, Munisipiu Lautem iha eskola 52, nia profesor volutariu hamutuk 179 profesores, kontratadu iha 107 profesores no ajente iha 20 pesoas mais la sufisente ona, para mais hapara kontratadu sira depois rekruta fila fali ho numeiu 800 resin ba profesores hodi fahe ba munisipiu sira hotu, nee hau senti sei sai perguntas boot, nee atu rezolve problema ka atu aumenta problema,” hatete nia.

Nia hatutan, tanba iha munisipiu ida deit presiza profesores 300 resin oan, entaun oinsa ho munisipiu sira seluk, nia efeitu la garante nafatin kualidade edukasaun se bainhira profesora la sufisientes.

(dom)

LEAVE A REPLY

Please enter your comment!
Please enter your name here