DILI, STLNEWS.co – IX Governu Halao sorumutuk Konselhu Ministrus (KM) aprova ona projetu dekretu-lei rua, neebe aprezenta husi Ministra Saúde, Elia A. A. dos Reis Amaral, ba kriasaun Institutu Nasionál Farmásia no Produtu Médiku (FPM).
Kriasaun institutu nee sede iha Munisípiu Dili no ho jurisdisaun iha teritóriu nasionál tomak. FPM troka Servisu Autónomu Medikamentu no Ekipamentu Saúde, I.P, nudár institutu publiku responsavel ba fornesimentu produtu farmaseutiku no ekipamentu mediku sira Servisu Nasionál Saúde nian.
“FPM bele hetan produtu farmaséutika no ekipamentu mediku sira, hanesan liu husi importasaun, produs produtu farmaséutika no ekipamentu mediku sira, asegura kontrolu kualidade ba sasan sira hetan ka prodús husi institutu no asegura pratika diak armazenamentu no distribuisaun ba Servisu Nasionál Saúde nian, no fan fila fali ba farmaséutika no unidade privada saude nasionál sira, bainhira presiza”, haktuir komunikadu neebe STL asesu Tersa nee (29/08/2023).
Aprovasaun ba Rejime Asisténsia Medika iha Rai liur.
Objetivu husi diploma nee atu adapta Rejime Asistensia Medika iha Rai liur ba realidade atual país nian, nunee mos pratika vijente/atual sira. Tanba nee, klarifika no armoniza konseitu sira ho prátika lejizlativa atual sira, esklarese no redis liña atuasaun husi interveniente oi-oin iha prosedimentu asistensia medika iha rai liur, no evita redundansia no atus la nesesariu sira hodi asegura asisténsia medikalais no efikas liu.
Diploma nee prevee, direitu asistensia medika iha rai liur ba benefisiariu sira Servisu Nasional Saude neebe hela iha Timor-Leste, no mos abranje situasaun sira, iha benefisiariu temporariamente iha rai liur, wainhira halao hela servisu Estadu no presiza asistensia medika urjente no inkompativel ho demora hodi fila mai Timor-Leste.
Komunikadu nee haktuir, Konsagra ona katak pasiente nee bele benefisia deit asisténsia medika iha rai liur karik akompaña husi mediku husi Servisu Nasionál Saude nian, no la posivel atu halo proposta asistensia medika iha rai liur mai husi instituisaun la integra iha Servisu Nasional Saude.
(gui)
