DILI, STLNEWS.co – Governu liu husi reuniaun Konselhu Ministru (KM) nomeia ona Superintendente Xefi Henrique da Costa nudar Komisariu Polisia Nasional Timor Leste (PNTL) no Superintendente Xefi Pedro Belo nudar Segundu Komisariu PNTL, mandatu durante tinan tolu.
Visi Ministru Interior (VMI), Antonio Armindo katak, nomeasaun ba Komisariu PNTL nee tuir ajenda neebe Primeiru Ministru hanesan mos Ministru Interior hatama, ajenda diskusaun atu nomeia Komandante Jeral PNTL foun hodi substitui Komisariu PNTL atual tuir lei organika artigu 25/2.
“Proposta Ministru Interior nia ohin pasa iha nomeasaun Komisariu PNTL mak Superintendente Xefi Henrique da Costa nudar Komisariu Polisia Nasional Timor Leste, no Superintendente Xefi Pedro Belo nudar Segundu Komisariu PNTL,” dehan Visi Ministru Interior (VMI), Antonio Armindo ba jornalista sira, hafoin remata enkontru Konselhu Ministru iha Palasiu Governu, Kuarta nee (15/03/2023).
Aliende nee, konaba pose ba komisariu foun nee, daudaun Komando PNTL liu husi komisaun ba prepara ona atu pose ba Komandante Jeral PNTL nomos Segundu Komandante Jeral PNTL.
“Portantu, Ministeriu Interior no Komando PNTL nian sei halao tomada pose iha loron 27 Marsu 2023 iha komemorasaun aniversariu PNTL nian,” dehan nia.
Aleinde nee, Komandante Jeral PNTL atual Komisariu Polisia Faustino da Costa nia mandatu sei termina iha loron 23/03/2023.
(alb)
