DILI, STLNEWS.co – Komisaun A trata asuntu Justisa no Konstitusional iha Parlamentu Nasional halao audensia ho Prezidente Tribunal Rekursu (PTR), hodi koalia konaba atu introdus kapitulu responsabilidade kriminal no responsabilidade koletiva.
Tuir Prezidente Komisaun A trata asuntu Justisa no Konstitusionais, Joaquim dos Santos katak, Komisaun A rona autoridade judisiariu sira konaba atu introdus material prosesual iha kodigu prosesu penal, atu introdus kapitulu ida konaba responsabilidade pesoas koletivas.
“Alterasaun lei kodigu prosesu penal nee sira halo besik hotu ona, mais nee atu hatama tan kapitulu konaba responsabilidade kriminal no responsabilidade pesoas koletivas, hanesan kompanhia ka asosiasaun sira ka ema neebe moris hamutuk iha organizasaun, se mak bele responsabiliza, nee mak atu hodi regula,” katak Deputadu Joaquim ba jornalista sira iha PN, Kuarta nee (22/03/2023).
Laos nee deit, maibe atu tama karik, tama iha kodigu prosesu penal parte jeral kapitulu primeiru, depois sira diskuti maioria deputadu sira iha Komisaun A ho autoridade judisial sira, sira hotu fo opiniaun katak, artigu nee importante atu hatama iha prosesu penal, maibe tempu agora seidauk bele.
Sira rekomenda, deputadu sira presiza halo estudu klean ba asuntu nee, depois iha proxima lejislatura iha ona rezultadu, atu nunee bele introdus.
Tuir dirijente komisaun A nee katak, kapitulu nee aprezenta husi deputadu sira iha Komisaun A, momentu diskuti hela kodigu prosesu penal iha Likisa, iha deputadu balu husu atu intrudus ida nee, tanba nia simu hanoin mai husi tekniku sira iha Komisaun A.
(gui)
