DILI, STLNEWS.co – Kompanhia Delbelo preparadu atu servisu hamutuk ho Prezidente Republika (PR) Jose Ramos Horta, hodi produs hahan Yougort fahe ba labarik no ferik katuas, hodi redus malnutrisaun iha Timor Leste (TL).
Kestaun nee hatoo husi Diretora Kompanhia Delbelo, Joana Belo ba jornalista sira iha Palasiu Prezidente Bairu Pite, Kinta nee (23/03/2023).
Nia hatete, ohin sira mai hasoru prezidente hodi relata saida mak mak bele halo, nunee bele kontribui redus malnutrisaun iha Timor Leste.
“Ami prepara atu halo kooperasaun ho prezidente, sempre disponivel, ohin ami hatoo katak, ami laiha transporte senhor, prezidente hatete, hakarak atu ajuda, no prezidente buka lai numeru ema nain hira mak presiza Yougort, depois ami tuur hamutuk fila fali para koalia oinsa atu halo distribui Yougort,” katak diretora.
Nia dehan, durante nee Kompanhia Delbelo halo ona distribuisaun Yougort ba Eskola Kafe iha Timor laran tomak, hanesan iha Dili, Baukau, Manatutu, Ermera Aileu, Oekusi no Eskola Kafe neebe eziste iha Timor Leste.
Nia hatutan, difikuldade neebe sira hasoru mak laiha transporte, tanba nee atu transfere hahan Yougort ba munisipiu fo tuir bis deit, maibe dala ruma bis la ba entaun difikulta ona, ida nee sai preokupasaun.
Iha biban nee, Prezidente Republika Jose Ramos Horta hatete, oras nee numeru malnutrisaun iha Timor Leste numeru aas tebes, tanba nee prezidente husu Kompanhia Delbelo atu buka apoiu oinsa fahe hahan Yougort ba eskola liu-Liu ba labarik no ferik katuas sira, nunee bele redus malnutrisaun iha rai laran.
Prezidente Republika hatete, sei buka numeru malnutrisaun no ida neebe mak presiza duni hahan Yougort sei bolu kompanhia Delbelo hodi buka dalan apoiu ba sidadaun sira, no prezidente mos buka atu apoiu transporte ba kompanhia nee, hodi bele tula hahan ba estudante no ferik katuas sira.
(eme)
