MANATUTU, STLNEWS.co – komunidade husi Suku Laikore, Postu Administrativu Laklo, Munisipiu Manatutu preokupa ho sentru saude neebe dook nomos estrada, tanba tempu udan sira labele ultrapasa.
Kestaun nee hatoo husi Xefi Suku Laikore, Postu Administrativu Laklo, Munisipiu Manatutu, Jeltino Tino do Rosario Das Neves Cabral ba jornalista sira iha nia knaar fatin, Kinta lokraik (30/03/2023).
Nia hatete, too oras nee sira sei preokupa ho sentru saude neebe mak dook.
“iha nee ami preokupa ba sentru saude, tempu udan entaun labele asesu ba Sentru saude tanba mota boot, labele halo buat ida, no difikulta mos ba estudante sira tanba iha nee inan aman preokupa liu ba Saude no edukasaun,” dehan Xefi Suku.
Nia mos husu governu atu konstroi sentru saude besik ba komunidade, nunee komunidade moras bele halo tratamentu.
“Husu ba governu se bele karik harii sentru saude ida iha nee para komunidade sira tempu udan bele fasilita netik komunidade sira iha Aldeia Likore ho Aldeia Bahadi,” katak nia.
Nia esplika, iha Suku Laikore Aldeia rua seidauk asesu ba linha eletrisidade no estrada, aldeia rua mak hanesan Aldeia Haturuin ho Rehatu.
Komunidade Suku Laikore kompostu husi Aldeia 4, total xefi familia hamutuk 287 no habitante 698.
Iha biban nee Prezidente Republika Jose Ramos hatete, ho problema neebe komunidade hasoru nia la kritika governu, tanba servisu barak tebes neebe presiza halo, Prezidente Republika mai hakarak ajuda laos tanba governu ka se, maibe tanba populasaun ida nee.
“Hau haree situasaun aat los, tanba merenda eskolar laiha nomos sesta bazika, hau la hatete governu mak halo korupsaun lae, governu tau osan diak ba sesta bazika nee, maibe depois fahe kontratu nee ba derepente sai kontrator ba sesta bazika, inves kada sesta bazika US$ 50, maibe folin too deit US$ 20, hau haree ho hau nia matan,” tenik prezidente.
Prezidente hatutan, iha vizita nee Xefi Suku mos husu buat rua, eskola ida ho sentru saude ida, nee prezidente promete sei halo iha tempu badak.
“Hau sei hatete ba governu, maibe governu atu remata ona iha 21 Maiu tinan nee, tanba nee labele preokupa ho governu, hau sei halo rasik, hau sei buka orsamentu husi prezidensial nian ou hau nia rasik, tanba hau la preokupa rai osan,” katak PR.
Prezidente haktuir katak, osan iha diak liu ajuda komunidade sira, tanba rai osan mate la lori no ba lalehan la presiza osan, maibe ba infernu parese presiza osan.
(eme)
