DILI, STLNEWS.co – Konfirmasaun votus ba alterasaun lei eleisaun parlamentar, hein Parlamentu Nasional haruka ba Prezidente Republika (PR) Jose Ramos Horta.
Prezidente Komisaun A trata asuntu Justisa no Konstitusionais, Joaquim dos Santos hatete, konaba konfirmasaun votus lei eleitoral nee aprova ona, agora iha Dirpec, foin daudaun nee konfirma deit votus, neebe Prezidente Parlamentu Nasional bele haruka ba ona PR.
“Prosesu kuandu iha materia ida mak PR veta haruka fila mai PN atu konfirma votus, depois konfirma tiha votus haruka fila fali ba PR, i tuir lei PN konfirma hotu votus, haruka fali ba PR prazu loron 8 tuir konstituisaun 88 numeru 1. Tanba nee, hein deit PN atu haruka ba PR”, katak Prezidente komisaun A, Joaquim dos Santos ba jornalista sira iha PN, Kuarta nee (22/03/2023).
Tuir nia, materia husu konfirmasaun ba PN nee la mai ona iha Komisaun A, maibe konfirma hotu PPN haruka fila ba PR.
Nunee mos Prezidente Parlamentu Nasional (PPN), Aniceto Guterres hatete, konaba konfirmasaun votus ba lei eleisaun parlamentar nee seidauk haruka ba PR, hein depois mak PN sei haruka ba PR atu bele promulga.
Entretantu, tuir artigu hirak neebe STL asesu iha konstituisaun artigu 88 konstituisaun republika hatete, promulgasaun no veto iha alinea 1 katak, iha prazu loron 30 nia laran hahu husi simu diploma naran ida husi PN, atu promulga hanesan lei, PR bele promulga eh uza direitu veto nian, hodi husu apresiasaun konaba lia tatoli nee ho fundamentu.
Iha alinea 2 hatete, mak PN iha prazu loron 90 konfirma karik votu maioria absoluta deputadu sira neebe servisu hela, PR sei promulga diploma ida iha prazu loron 8, hahu husi loron neebe nia simu.
Iha alinea 3 katak, nee mos sei presiza maioria dois tersus deputadu sira neebe prezente no tenki liu maioria absoluta deputadu sira neebe servisu hela, atu konfirma diploma sira neebe iha materia 95 nian.
Alinea 4 hatete, iha prazu loron 40 nia laran, simu husi diploma naran ida governu nian atu promuloga, PR bele promulga eh uza direitu veta, hodi hakerek ba governu fo hatene nia veta katak sa.
(gui)
