DILI, STLNEWS.co – Sekretaria Meza Paralamentu Nasional (PN), Deputada Lidia Norberta afirma, korum funsionamentu la too semana 2 tuir-tuir malu, kada Tersa PN labele halao plenaria, tanba husi deputadu nain 65 tenki prezente deputadu 23 mak bele prienxe korum funsionamentu hodi halao plenaria.
Nia hatete, iha reiunaun lider bankadas semana 2 ka 3 ba kotuk molok hahu kampanha ba eleisaun parlamentar 2023, iha ona hanoin husi meza no hanoin balun partilha husi bankadas sira katak, plenaria semana ida realiza dala ida haree ba ajenda neebe mak iha, tanba nee desidi kada loron Tersa halo plenaria.
“Maibe felizmente iha loron Tersa dala rua ona iha semana kotuk ho semana ida nee plenaria laiha, maski deputadu balun mai, mais korum funsionamentu laiha ka la too, tanba korum funsionamentu husi deputadu 65 tenki iha deputadu 23 mai para halo korum funsionamentu, maibe semana kotuk ho semana nee deputadu sira marka prezensa mais la too 23, entaun labele halo plenaria,” dehan sekretaria meza PN, Deputada Lidia Norberta ba jornalista sira iha PN, Kinta nee (04/05/2023).
Nia dehan, maibe iha ona komunikasaun ka informasaun ba hotu ona bankadas katak, semana oin iha loron Tersa sei iha reuniaun plenaria, tanba nee husu ba deputadu sira mai hodi bele halao plenaria.
Nia akresenta, deputadu sira nia servisu no agora daudaun ho eleisaun parlamentar, entaun sira tenki tun duni ba terenu hodi bele hetan apresiasaun husi povu sira ba sira nia reprezentasaun iha parlamentu, no ba programa neebe mak iha atu povu bele hatene, nee mos servisu fundamental ida.
Nia hatutan, relasiona ho servisu iha parlamentu nian, ida nee mos fundamental tebes-tebes, entaun buka oinsa atu ajusta hotu ba pozisaun sira hodi instituisaun nia vida agora daudaun labele para atu kontinua lao, nomos partidu politiku sira nia atividade orsida sei mai reforsa iha PN, ida nee mos lao nafatin.
(dom)
