DILI, STLNEWS.co – Reprezentante povu iha uma fukun Parlamentu Nasional (PN) afirma, husu publiku no povu tomak atu kria estabilidade no harmonia iha sosiedade hodi fo espasu ba IX Governu, nunee fokus ba servisu hodi normaliza hikas situasaun neebe durante nee enfrenta, no bele lori hikas esperansa povu nian.
Tuir Visi Prezidente Bankada CNRT, Patrocino Fernandes hatete, esperansa povu tomak nian ba governu foun, haree ba situasaun tinan 5 ka 6 nian laran halo ema hotu tau esperansa ba governu foun mai nee.
“Ita hotu bele iha konsiensia, nudar sidadaun atu kontribui kria estabilidade, no kria harmonia iha sosiedade tomak hodi fo espasu ba IX Governu atual, fokus ba halao servisu hodi fo fali esperansa ba povu, liga ho situasaun sira neebe iha tinan 6 nian laran ema hotu hatene,” dehan nia ba jornalista sira iha PN, Kuarta (28/06/2023).
Nia tenik, tanba governu ida ho nia mandatu tinan 5, maibe haree ba iha tinan 6 nian laran laos deit situasaun marka pasu iha fatin, mais hakat liu kedas ona ba kotuk, entaun todan tebes ba governu ida atu mai, buka oinsa muda situasaun sira nee, atu lori fila fali esperansa ba povu nomos nasaun ida nee.
Nia hatutan, situasaun sira nee laos buat kmaan no laos buat ida kiik oan, maibe buat ida neebe boot tebes, entaun hanoin katak laos deit deputadu sira iha PN maibe publiku tomak, media, sosiedade sivil no povu tomak tenki hanoin ida deit, oinsa atu fo forsa no esperansa ba governasaun mai nee.
(dom)
