DILI, STLNEWS.co – Partidu FRENTI Mudança neebe lidera husi Ricardo Cardoso Nheu apela ba kuadrus politikus no militante sira atu fo apoia no vota ba Partidu CNRT, hodi manan iha eleisaun parlamentar iha loron 21 Maiu 2023.
Ohin kuadrus Partidu FRENTI Mudança, Anselmo Vitor Ximenes reafirma desizaun neebe hasai husi kuadrus politiku Partidu FRENTI Mudança lideradu Presidente Ricardo Cardoso Nheu no Sekretariu Jeral Daniel Pereira, hodi fo apoiu ba CNRT iha eleisaun parlamentar 2023.
“FRENTI-Mudança laos foun ba maun boot Xanana no CNRT, maibe FRETI Mudança iha desizaun balun la admite ami ba eleisaun, maibe hakarak informa ba kuandrus CNRT katak, desidi no halo afiarmasaun ami nia votus nee tenki kuda iha rai bokur atu hetan isin diak, desizaun nee aviza ona ba militante no kuadru sira atu vota ba CNRT, hamutuk ho maun Xanana atu hadia rai no povu ida nee,” informa Kuadrus Politiku Paridu FRENTI Mudança, Anselmo Vitor Ximenes liu husi konsolidasaun Partidu CNRT iha Bidau Santa Ana, Domingu nee (02/04/2023).
Tuir planu, Segunda feira 03 Abril ekipa sei entrega ofisialmente karta politika ba lideransa Partidu CNRT iha sede Bairos dos Grillos, Dili.
“Karta ofisial sei too iha sede CNRT no ekipa ida sei mosu iha neeba, ami nia votus sei fo ba CNRT iha tinan ida nee. Hau nia prezidente no Sekretariu Jeral nia mensajen mai atu ita hamutuk hadia sistema justisa iha rai nee, ami nia lista mak ema baku mate, maibe sira la iha razaun, tanba saida mak sira baku mate ami nia lista nee,” dehan Daniel.
Nia dehan, mezmu Tribunal Rekursu hasai Partidu FRENTI Mudança hodi la hola parte iha festa demokrasia tinan nee, ho razaun neebe la klaru, maibe lideransa no militante partidu kontinua tau fiar ba Partidu CNRT neebe Lideradu Xanana Gusmão atu hadia nasaun no povu Timor-Leste nia futuru ekonomia diak liu tan.
(cri)
