DILI, STLNEWS.co – Deputadu Cornelio da Costa Gama “L7” lamenta ho desizaun husi Partidu Libertasaun Popular (PLP), neebe hasai nia husi Xefi Bankada PLP, tanba laiha konhesimentu bainhira foti desizaun nee.
Nia hatete, koalia konaba halo subtituisaun ba iha Xefi Bankada PLP, haree oras nee politika la tuir ona lei neebe iha TL nee, idak-idak ho ninia inisiativa.
“Tanba sira hasai hau nein iha konhesimentu, konforme sira reuniaun iha kotu-kotuk hakarak hasai, mais hau dehan ba sira katak, nasaun nee liberta laos S1 ho S2 mak liberta, maibe ami sira analfabetu mak liberta nasaun nee,” dehan nia ba jornalista sira iha PN, Kinta nee (13/03/2023).
Nia afirma, luta laos lori politika ka grupu ida nian, maibe agora funu hotu ona no matenek barak, konforme sira nia hakarak, sira nee satisfamasaun, maibe agora funu hotu ona, entrega poder ba alin sira foin sae para kaer fali nasaun nee, laos imi ba hatun ida no hasae fali ida seluk.
Nia hatete, tanba agora nee ukun nain sira la preokupa ba istoria, maibe gosta mak hatun malu no hasae malu deit, veteranus sira mak moe fali, tanba funu nee liberta husi analfabetu, maibe matenek sira agora ukun gosta mak hatun malu no hasae malu.
“Hau sai husi Xefi Bankada PLP nee laiha buat ida, hau entrega ba hau nia alin sira mak Xefi Bankada ba, maibe hau husu ba sira para konsidera nafatin hau, maibe sira nia sala mak la konvida hodi tuir reuniaun nee mak hau kestiona, maibe laiha buat ida,” tenik nia.
Nia argumenta, nia sidauk hatama karta rezignasaun ba Partidu PLP no Bankada PLP, tanba laiha sala ruma hodi nia halo rezignasaun.
“Hau la entrega karta ida ba partidu no bankada, hau hanoin dala rihun ida mak hatama karta ba, tanba hau laiha sala ruma, maibe agora sira hasai ona hau entaun hau livre, karik sira hasai hau tanba sala ruma entaun bele lori hau ba tribunal, maibe hau la sala,” nia hakotu.
Aleinde nee, Visi Bankada PLP, Deputadu Francisco Vansconcelhos dehan, la presiza informa ba nia (L7) no laos nia tenki hatan ka lae, tanba nee desizaun partidu nian, neebe deputadu kumpri deit. Se bankada nee apenas kordena deit sasan iha bankada laran, tanba bankada mos la desidi buat ida, mais desidi nee kolejial, desizaun hotu-hotu iha bankada nee kolejial.
Nia hatete, agora tanba saida mak Partidu PLP hasai karta ida nee, tanba Deputadu L7 nia deklarasaun nee katak, nia reforsa apoiu partidu seluk, kuandu apoia partidu seluk nee signifika iha impedimentu.
“Kuandu hau dehan, hau partidu PLP ho fasilidade buat hotu uza PLP nian, depois dehan hau ba Partidu FRETILIN no apoia nia, entaun oinsa hau iha responsabilidade moral hodi organiza bankada nee imposivel, tanba nee Prezidente Interinu PLP nian haruka karta mai PPN hodi troka nia, no hau informa ona ba Deputadu L7 katak, apartir Segunda ohin ita boot laos ona Xefi Bankada, no Xefi Bankada nee iha nia visi nain 2 kedan, neebe nia laiha kompetensia, nia hanesan reprezenta karik iha enkontru ruma bankada ida nee mak xefi bankada no nia funsaun laos buat boot ida,” hatete nia.
Nia afirma, PLP konsidera mak nia sei deputadu nafatin hela nee, agora Xefi Bankada nee laos kargu mais deputadu nee mak kargu.
Nia hatutan, maski Deputadu L7 seidauk halo karta rezignasaun, mais kualker linguanjen neebe sai nia mak tenki responsabiliza ba ninia linguajen nee, tanba nia seidauk halo karta, mais liu husi ninia intervista nee faktus konkretu ida, tanba ema hotu hatene.
(dom)
