DILI, STLNEWS.co – Prezidente Parlamentu Nasional (PPN), Maria Fernanda Lay afirma, atividade deputadu sira tun ba halo fiskalizasaun iha munisipiu la presiza trankadu lori media nasional, tanba laiha kustu ba jornalista sira.
“Ami iha radiu, televizaun no youtube, neebe povu atu akompanha oinsa tan ba hamrik haree. Hau hanoin lae, se lae hau tenki selu tan povu ba haree. Hau hanoin ita tenki hanoin pratiku hanesan nee, la presiza lori media akompanha deputadu sira halo fiskalizasaun, tanba hanesan hau nia telefone mos bele hasai lori ba publika, nunee labele trankadu lori malu,” dehan PPN, Maria Fernanda Lay ba jornalista sira iha PN, Kinta nee (21/09/2023).
Nia afirma, ba pesoal hanoin primeiru kustu, i media tuir lo-loos atu buka notisia tenki iha meus rasik, entaun pesoalmente hanoin sei koalia ho Konselhu Imprensa (KI).
“Tanba media ohin loron nee, hau bele lori telefone ida on air. Hau ba Portugal ho São Tome Prinsipe, hau la lori media, maibe media G7+ akompanha hau. Ema ida deit nia bele halo live iha mundu seluk mai ita,” afirma nia.
Fernanda Lay hatutan, sei iha atividade lori media tenki lori Cameraman no Reporter ida hodi halo entrevista, entaun buat hotu kustu. Neebe hanoin KI nia membru kompletu ona, ba oin saida mak bele toma ho simples iha mundu rai-laran nian, neebe la presiza kamera boot, maibe ho telefone mos bele funsiona ona.
Aleinde nee, Deputada Cedeliza do Santos katak, lo-loos PN tenki lori media bainhira ba halao atividade deputadu sira nian hanesan ba halao fiskalizasaun, nunee media bele foti atividade neebe deputadu halo, hanesan bainhira ba halo fiskalizasaun iha munisipiu ka iha Dili laran.
Entretantu, tuir observasaun STL katak, durante hahu mandatu VI Lejislatura iha uma fukun Parlamentu Nasional (PN) banihira deputadu sira iha kada komisaun ba halao atividade fiskalizasaun tantu iha Dili laran ka munisipiu la lori media destakadu iha PN.
Maibe lori deit mak media Parlamentu Nasional (PN) hodi akonpanha atividade deputadu sira nian tuir ajendamentu neebe iha atu halo fiskalizasaun iha Dili ka munisipiu sira.
(dom)
