DILI, STLNEWS.co – Bankada Partidu Demokratiku (PD) iha Parlamentu Nasional (PD) konsidera asesor internasional neebe halo servisu iha Timor, tanba nesesidade kada instituisaun, nunee labele buka atu julga deit asesor sira la halo servisu, maibe tenki fo servisu ba sira.
“Problema instituisaun idak-idak iha nia nesesidade ba asesor, neebe atu presta servisu iha neeba no presta servisu dehan oitaun, nee sasukat husi neebe atu barak ho oituan,” dehan Xefi Bankada PD, António da Conceição Kalohan, ba jornalista sira iha PN, Kinta (27/07/2023).
Nia katak, kuandu barak nee ema komprende servisu no hatene ninia servisu todan ema seluk foti hela, tanba nee nia bele hatene dehan asesor nee servisu duni, mais nia rasik la hatene nia servisu mak dehan fali asesor la servisu, tanba nia la hatene atu fo servisu ba ninia asesor.
Nia afirma, lamentasaun sira nee presiza halo intropeksaun diak, hodi komprende asesor sira nia servisu, hodi labele dun sala ba ema seluk.
“Iha parlamentu hau mos iha asesor, neebe halo sira nia servisu bazeia ba deputadu sira fo, deputadu sira nunka bele dehan fali asesor sira halo servisu oituan deit,” nia tenik.
Xefi Bankada PD nee afirma, Timor tenki buka konstrui mentalidade ida hodi valoriza malu no rekonhese mos nia frakasu, buat sira hanesan nee dala ruma iha mai husi sentimentu emosional laran moras nian.
Klaru katak, Timor presiza hela asesor iha area saida mak bele, maibe asesor iha neebe deit inklui iha nasaun estranjeiru sira mos iha asesor.
“Malae ho malae deit servisu fo asesoria ba malu, enkuantu Timor ida foin ukun aan tinan 21 nee tidak pernah menjadi menteri, tiba-tiba menteri labele presiza ema, tenki presiza ema, ita foin tinan 21 rai sira seluk nee estabelesidu sekulu 100 tahun ona mos sei uza asesor. Neebe hau hanoin ladun diak kuandu ita koalia fo sala ba asesor, kuandu devia ema ida neebe asumi responsabilidade la hatene saida mak nia atu halo,” hatete nia.
Nia sublina, asesor sira manan salariu boot tanba iha lei konaba kontratu termu sertu neebe difini eskala salarial ba asesor sira nomos tekniku sira hahu husi US$ 400 too US$ 8000. Ida nee iha lei Timor nian hodi uza ba kontratu termu sertu tantu ba asesor nasional no internasional tuir kapasidade sira nian no lei fo dalan.
Iha parte seluk, Observador Politiku UNTL, Felisberto de Carvalho katak, ba asesor sira tenki iha balansu entre salariu ho produtividade de servisu.
“Asesor tenki hatudu produtividade servisu neebe diak, liu husi lei sira neebe produs, desizaun sira neebe mak foti hodi ajuda ministru,” dehan nia.
Nia sublina, maibe governu tenki uza ona asesor nasional sira neebe iha kapasidade naton hodi evita kustu boot ba asesor internasional.
(gui)
