DILI, STLNEWS.co – Prezidente Parlamentu Nasional (PPN), Aniceto Guterres Lopes fo ona tempu ba lider bankadas durante semana 2 atu halo diskusaun konaba figura ida neebe atu kandidatu ba Komisariu Komisaun Anti Korupsaun (KAK), maibe too ohin loron laiha entendimentu ba malu entre Bankada FRETILIN ho Bankada CNRT nudar reprezentante povu iha uma fukun Parlamentu Nasional (PN).
Sekretaria Meza Parlamentu Nasional, Deputada Lidia Norberta hatete, semana oin eleisaun ba Komisariu KAK nafatin tau ba iha ajenda, mezmu deputadu sira laiha entendimentu, maibe ida nee la taka dalan ba meza parlamentu atu tau ajenda nafatin ba eleisaun Komisariu KAK nian.
“Tanba nee, iha semana oin sei iha ajenda ba eleisaun KAK nian nafatin, maski PPN fo ona tempu ba sira atu halo konsulta ba malu, mais laiha entendimentu,” dehan nia ba jornalista sira iha PN, Kinta nee (16/03/2023).
Nia afirma, maibe husi FRETILIN ohin pronunsia katak ida nee iha lei, bainhira haree lei konaba eleisaun Komisariu KAK nian, iha neeba determina kedas inisiativa mai husi governu, tanba nee parte FRETILIN labele pronunsia buat ida.
(dom)
