DILI, STLNEWS.co – Prezidente Komisaun F trata asuntu Saude, Seguransa Sosial no Igualidade Jeneru, Deputadu Noe da Silva afirma, lei protesaun labarik no joven sira iha perigu la garante atu halakon total trabalhador infantil iha Timor Leste (TL), maibe bele minimiza risku sira neebe atu akontese ba labarik no jovens sira.
Noe dehan, lei konaba protesaun labarik no joven sira iha perigu Parlamentu Nasional aprova ona, i agora daudaun iha ona promulgasaun nia laran, maibe iha lei nee dehan, depois de promulgasaun no publikasaun iha Jornal Republika, minimu tenki too fulan 8 masimu tinan 1, depois mak tama ba iha ninia implementasaun, entaun agora foin mak tama iha faze publikasaun iha Jornal Republika, tenki lori tempu, dala ruma too 2024, ninia prosesu implementasaun foin mak bele haree husi iha neeba.
“Atu halakon trabalhador infantil, hau hanoin difisil, tanba ema mai kedas ho pratika ida nee kleur ona, lei nee ita foin mak halo, mais konserteza garante husi lei nee bele minimiza risku sira neebe mak sei akontese ba ita nia oan ho joven sira, tanba nee ita atu fo kedas garantia ba ninia prosesu lalaok sira neebe mak iha interese sidadaun nee, hau labele fo garantia,” dehan Deputadu Noe da Silva ba STL iha Parlamentu Nasional, Tersa nee (09/05/2023).
Nia tenik, tanba lei nee depende ba instituisaun sira neebe mak sei tutela hodi bele implementa lei nee, ezemplu sira tenki halo divulgasaun informasaun ida neebe klaru, no tenki halo sosializasaun lei nee, tenki abranje ba kedas too iha povu sira neebe kiik liu, enkuantu lei nee Parlamentu Nasional halo, maibe lei nee iha deit leten ka iha deit governu, ninia implementasaun nee sei difikulta nafatin.
(dom)
