DILI, STLNEWS.co – Lideransa troika Lere Anan Timur hatete, foinsae sira labele nega jerasaun tuan sira nia sakrifisiu ba luta, maski diferente partidu, maibe sira nia hamutuk mak lori Timor ba independensia.
Lideransa Troika Lere Anan Timur hatoo kestaun nee bainhira halo abertura kampanha FRETILIN iha Munisipiu Baucau, Postu Administrativu Vemase, Kuarta (19/04/2023) hatete, ohin loron partidu hotu tun kampanha, lider nasional mos tun hanesan Xanana Gusmao no Taur Matan Ruak, maibe militante hakilar nee laos ami nia avo hatan ba nee lideransa troika hatete, partidu mak ketak-ketak, maibe sira mesak luta nain.
“Ohin loron kampanha iha fatin hotu, lider istoriku nain rua ida mak imi nia Avo Nana, imi nia Avo Taur, partidu mak laos imi nia, se imi dehan laos imi nia avo, entaun imi nia Avo Mari tun sira seluk mos dehan laos, imi tenki konsidera ami hotu, se lae imi haluha esforsu neebe ami halo, too ohin loron ita ukun rasik aan,” dehan lideransa troika nee.
Tenente Jeneral Reformado Lere nafatin enkoraza foinsae sira atu nafatin fiar lideransa tuan sira, maski ho diferensa partidu, maibe nafatin konsidera, tanba lideransa sira nia hamutuk mak lori Timor Leste hetan independensia.
Lere haktuir, FRETILIN tenki sai modelu no marka diferensa hodi hatudu nafatin etika moral iha sosiedade nia leet, tanba nee bainhira kampanha hotu fila ba idak-idak nia fatin karik, iha provokasaun ruma husi ema seluk, nafatin hakmatek no hatudu nafatin maturidade diak.
“Ema provoka imi diak liu lalika responde, sei provoka deit lalika responde, Partidu FRETILIN marka diferensa, hau katuas ona, joven mos oin ho oin la hakiduk, maibe ida nee ita lakohi, partidu seluk mos eduka nia militante sira katak, violensia jero baku malu oho malu tempu liu tiha ona, uluk funu mak dehan o mane hau mane, ida la tauk ida, agora la tempu ona,” katak nia.
(eme)
