DILI, STLNEWS.co – Lideransa Troika Lere Anan Timur hatete, tinan 5 agora nee pajina ikus ba lider tuan sira atu ukun, nunee lori jerasaun foun sira ba dalan los.
Lideransa Troika Lere Anan Timur hatoo kestaun nee liu husi nia aprezentasaun, bainhira halo dialogu ho militante sira iha Postu Administrativu Vera Cruz, Tersa nee (25/04/2023).
Lider troika nee hatete, lider istoriku sira ida mak lideransa Partidu FRETILIN Mari Alkatiri, ida mak Prezidente CNRT, ida mak Prezidente Republika, sira nee mak komando da luta, sira sei moris sira mak bele dehan se mak ukun, se dehan ukun ba, tanba katuas ona nee bele. Enkuantu sira seidauk dehan katak ukun, hein lai, labele hadau, imi hadau laiha fatin, aman sira nee mak iha konsiensia responsabilidade ba vida nasaun no foinsae sira.
“Tinan 5 ida nee ita loke pajina, surat karik nee ultima pajina ona ba sira nain hira nee, ba sira la repete tan, anaunser Maromak halo milagre, katuas sira neebe iha nee ita nia loron tun ona, atu sae fali laiha, ita lider sira mos hanesan nee, nee ultima pajina, ita tenki halo buat hotu iha tinan 5 nia laran, atu bele lori jerasaun foinsae ba tuir dalan los,” dehan Lere.
Lideransa Troika nee hatete, primeiru kampanha iha Munisipiu Baukau juventude sira balun hatete, Xanana laos sira nia avo, ida nee lalos.
“Ami iha Baukau hau dehan avo Nana, sira dehan Xanana laos ami nia Avo, entaun Soeharto mak imi nia avo ba, Xanana laos se tan, aban bainrua ita mak ukun ka partidu neebe mak ukun mos ukun tuir lei ho kultura tradisaun, entau ita nia kultura tradisaun mak nee, katuas iha oan no bei oan, beioan labele sai fali aman, o bei oan nee beioan ona, aman nee aman ona, se ohin loron la konhese ona avo Nana, kuantu mais aban bainrua joven sira imi lakonhese malu tan, imi sei fahe malu aat liu tan, ema oportunista aproveita,” dehan nia.
Lere hatete, iha parte balun hatete Xanana laos nia avo, no iha fatin seluk mos dehan Mari laos sira nia avo, hodi basa liman hakilar hatun malu, maibe ema neebe mak iha nasionalizmu husu kuitadu, tanba uluk funu hamutuk mak ukun aan agora trata malu.
Koordenador Postu Vera Cruz, Rui Ilidio husu ba militante hotu atu nafatin respeita lideransa tuan hotu iha Timor Leste.
“Hau mos lori ona programa ba kraik no husu tane aas lideransa Timor Leste nia ses husi liafuan provokatoriu, para ita fokus los ba ita nia militante no simpazitante sira para lori vitoria ba iha 21 Maiu,” katak nia.
(eme)
